No.4366/2021-2022

Aizawl, the 22nd March, 2022: Khawvel hmun dangte rualin vawiin khan I&PR Auditorium Champhaiah tui pawimawhna leh humhalh a tulzia inzirtirna, ‘World Water Day 2022’ WSSO, PHED Mizoram leh PHED  Champhai WATSAN Division te bultumin hman a ni a. He hun 'Leihnuai Tui; Hmuh theih loh kha hmuh theihah’ tih thupui hmanga hman hi Pu P. Lalhmingliana, Principal, Govt. Champhai College chuan khuallian niin a hmanpui a ni.

Pu P. Lalhmingliana chuan kum tinin Mizoramah tuihnain kiam lam a pan zel thu sawiin, "Ram ngaw kan thiah avangte leh tuihna kan humhalh that loh vang a ni", a ti a. Kan mamawh hrang hrang leina atana pawisa sen kan hreh loh laiin nitina kan mamawh, a tel lova kan awm theih loh tui dahkhawlna lei tum lo kan tam lutuk hi kan inherrem a ngai a, kan ngaihhlut zawng kan thlak a ngai a ni, a ti a. Tui hna ti tam thei tura theihtawpa tan lak a tul thu sawiin, a theihna kawng hrang hranga tui luangral tur venga a taka kan chet chhuah  a ngai tawh a ni, a ti bawk.

Tui thianghlim pawimawh zia sawiin, "Pathian min siam danah kan taksain a mawmawh tawk tui thianghlim kan hmuh loh chuan kan taksa bung hrang hrang te'n an nih tur ang an ni thei lo a ni", a ti a. Kan tui tlan hnar hrang hranga bawlhhlawh tam lutukte chu ngaihmawhawm a tih thu pawh sawiin, khawtlangin kan vei a, a tihfai lama tan lak a tul thu a sawi bawk. Khuallian  chuan tui atanga natna kan kai theih hrang hrang laka kan him theihna turin PHED in damdawi hmanga sawngbawlin kan inah min rawn thlensak thlap a, kan lirthei leh kan pangpar tui pekna tur a ni lo tih kan hriat reng a ngai a ni, a ti a. Kan tui dawn ang angte renchem taka hman hi mipuite mawhphurhna a ni tih kan inzirtir uar a ngai hle a ni, a ti bawk.

He hun hi Er. ZD Dengthuama, E.E, PHED Champhai WATSAN Division & Member Secretary, JJM chuan a kaihruaia, Sub-Hqtrs. YMA Champhai aiawhin President Pu F.Lalrinmuana'n tuihna humhalh a pawimawh zia sawina hun nei bawkin, mihring bakah thilnung tinrengin kan mamawh, a tello a kan awmtheih loh tui kan humhalh a pawimawh a, tan kan lak sauh sauh a tui humhalh kan in zirtir uar a tul a ni, a ti bawk.

He hunah hian World Water Day puala Drama competition lawmmante semchhuah a ni a.
Lawmman dawngtute chu:
1) Lawmman 1 na: Champhai Vengsang Branch YMA
2) Lawmman 2 na: Khawbung Branch YMA
3) Lawmman 3 na: Vangchhia Branch YMA te an ni a, lawmman atan hian lawmpuina thuziak leh pawisafai hlan an ni.
4) Participation Prize: Mualkawi Branch YMA,  Dungtlang Branch YMA, Leithum Branch YMA

Mimal lawmman dawngtute:
1) Best Director: K. Lalchamliana, Champhai Vengsang Branch YMA
2) Best Script Writer: Laltlansanga, Mualkawi Branch YMA
3) Best Actor: Lalramchhana, Leithum Branch YMA
4) Best Actress: Chawngzikpuii, Champhai Vengsang Branch YMA

Er. Zothansanga, SDO, PHED Khawbung Sub-Division chuan lawmthu sawiin he hun hi a khar a ni. Vawiin World Water Day lawmna hunah hian YMA hotute, Zirlai leh PHE Department thawktute an tel a ni.

He ni pual hian tukin khan World Water Day Rally Dawrkaikawn atanga Circuit House thlenga neih a ni a, rally-ah hian Govt. High School Ruantlang zirlai leh zirtirtute bakah PHE Department thawktute an tel a ni.

United Nations Conference on Environment and Development chuan kum 1993, March ni 22 khan World Water Day a lo hmang tana, hemi kum atang hian World Water Day hi thupui thlanbik neiin kumtin khawvel hmun hrang hrangah hman thin a ni.