Vawiin khan Kahrawt Community Hall, Champhaiah Mizoram Youth Commission huaihawtin MYC Youth Summit leh Road Show, 2018 neih a ni a. He hunah hian Pu TT Zothansanga, Champhai North bialtu MLA chu khuallian niin MYC Youth Summit & Road Show, 2018 hawnna a nei a. Pu Joseph Lalhimpuia  MLA, MYC Chairman  chuan he hun hi a telpui a ni.

Khuallian Pu TT Zothansanga chuan Champhai hmun ngeia MYC hmalakna a Youth Summit leh Road Show buatsaih a ni chu lawmawm a tih thu a sawi a. Zirna leh thiamna zir kawngah a bulthum atanga thar thawh angaih thu leh mi hausa leh thiltithei deuhte chu zirna leh khawtlang tihhmasawn kawngah luangchhuak ve se a duh thu a sawi a. A mawmawh leh neilote hmakhua ngai chung zela hmathar zaua,   khawtlang leh hnam tana ngaihtuahna sen huama penchhuah chu a tul tawh a ni, a ti a.  Khawvel mila inherdanglam a ngaih tluk zetin tunlai thiamna social media hman kawngah chin tawk neih angaih thu a sawi a. Tunlai chhanah  zirna chu indona a ni a, chu indonaah chuan dawngdah leh zawmthawt a thianglo a, thil thiam dem dum aiin kalna lamah a tha ber leh thiam ber nih a pawimawh tawh zawk a ni, a ti a. Nu leh pate pawh fate lehkhabu chhiar tam tur leh  zirna lama tlan tura fuih turin a chah a. Zirna lamah Champhai chu a than harh a hun thu sawiin zirlaite chu zirlai an  nih lai atanga tum mumal tak nei tur leh chumi thleng thei ngei tura theihtawp chhuah turin a chah a. Khuallian chuan MYC   ruahmanna leh  remhriatna zara Youth Summit and Road Show buatsaih chu a remchanna lei a, tangkai thei ang bera chhawr  turin a chah nghal bawk a ni.

He hunah hian Pu Joseph Lalhimpuia, MYC Chairman pawhin thu sawiin MYC Chairman anih angin thalaite khawvel thar siam tura hmachhawp tam tak a neih  thu a sawi a. Nimin lama MBSE buatsaih HSLC result tihchhuah taka pass thar zawng zawngte a lawmpui rualin  pass zo ve lo vanduaina tawkte  thinlung taka a tuarpui  thu a sawi a. Zirlai vanduaite chu hnual mai lova, vanduaina chu hlawhtlinna hmahruaitu a ni tih hre thar leh turin a chah a. Champhai hmuna MYC Youth Summit leh Road Show buatsaih anih theihna tura tha thawhtute chungah lawmthu a sawi a. Mizote chu thiamna zir kawngah tuna aia kan tan zual angaih thu leh abik takin All India Level Exam-ah  kan elpuite hmakhalh ngei thei tura tan lak angaih thu a sawi a. Tunlai khawvel inelna sang takah sumdawnna, zirna leh thiamna hmanga ram chhan a ngaih tawh thu sawiin, tunlai mil tur hnam Pasaltha chherchhuah kawngah MYC chuan tan a lak zel dawn thu a sawi a.  MYC chuan thalai lehkhathiam, tanpuina mamawh leh beiseiawmte a theih ang tawkin sum leh pai, coaching, training leh thil dangtein a tanpui thin thu a sawi a. Thangthar leh naupang zawkte entawn  turin district tin atangin mi entawntlak Thalaite Idol nih tlin ngei tur mite thlan anih tur thu a sawi lang bawk a ni. MYC Chairman chuan Jet Airways nen thawk dunin tunhnaiah Cabin Crew 5 lak anih thu a sawi a, Zirlai titha hlawhtlinnna chang leh beiseiawm tak takte kalzelna puihna turin Cash incentives pawh semchhuah anih thu sawiin, tunhnaiah   cheng nuai 30 chuang sem a ni tawh bawk a ni, a ti a. Youth Summit & Road Show chu zirlai leh thalaiten an hlawkpui ngei theihna turin duhsakna a hlan a ni.   

He summit leh Road show hawnna hun hi Pu Vanlalngaihsaka, Champhai DC   chuan a kaihruai a. Pu C.Lalbiakzauva, DEO&DPC (RMSA) Champhaiin lawmthu sawina neiin hun a khar a ni. He hunah hian Aizawl lam atangin LE&IT leh ITI hotute, Champhaia sawrkar Department hotute, Sikul naupang, khawtlang leh NGO lam hotute an tel a ni. MYC Summit leh Road Show 2018-ah hian Stall hrang hrang 17 hawn niin, hengah te hian a duh leh mamawhtute tan hriat duh zawng leh mamawhte thlen theih a ni a, Stall hawngtuten lo dawngsawngin an lo buaipui dawn a ni.

Mizoram Youth Commission (MYC) chuan, Mizo á¹­halaite'n kawng hrang hranga hma an sawn theih dan tur ngaihtuahin, ‘Thalaite Khawvel zauh ang aw’ tih thupui hmangin  April 17, Thawhlehni aá¹­ang khan Youth Summit & Road Show hi a lo buatsaih tan tawh a. May thla tawpa district khawpui tin tuam chhuak vek hman turin Youth Summit and Road Show, 2018 hi an kalpui mup mup a ni.

Vawiin MYC Youth Summit &  Road Show hi mi 1500 chuangin an chhim a. Commerce & Industries hnuaia handloom Stall-in Rs 30000/- chuang an thil phochhuahte an hralh a. Champhai Local Entrepreneurs pahnihte  chu an item mipuiin an hlut em avangin Lungleia Youth Summit & Road Show kharna neih anih hunah stall hawng ve tura tih an ni a.  LESDE hnuaia Workers Welfare Board-ten 'On the spot registration' an buatsaih chuan mi ngaihven a hlawhin awareness hlawhtling tak an nei a. He programme hi School leh College zirlai naupangten an hlawkpuiin an  hlut hle a ni.