Nimin khan Bungtlang 'S' ICDS Project hnuaia anganwadi worker-te tan Bungtlang 'S' Community Hall-ah nu leh naute hriselna atana sawrkar laipui ruahmanna Pradhan Mantri Matru Vandana Yojana (PMMVY) chungchang zir hona buatsaih a ni.

He hun hi Lawngtlai District Programme Officer Pi Lalnunthari chuan kaihruaiin, kal khawmte lawmna thu a sawi a. LIKBK Bungtlang 'S' bialtu Pastor Rev. H. Lalsangvunga chuan hunserh a hmang a. Bungtlang 'S' CDPO Pu C. Chhundenga chuan anganwadi worker-te fuihna thu leh PMMVY an lo kalpui tawh dan sawiin, beneficiary mi 16 velin 1st instalment an dawn tawh thu a sawi a. District Programme Coordinator F. Lalengvari chuan PMMVY chungchanga hriat tur pawimawh hrang hrang sawiin, a hlawhtlin nana anganwadi worker-te tih tur leh mawhphurhna te a zirtir a ni.

PMMVY hi nu leh nausen thihna titlem tura ruahman a ni a. Hmeichhe kum 19 tling chin, January ni 1, 2017 hnu lama an fa hmasa ber tur pai, hri danna lak ngai zawng zawng la vek, nau pai vanga hamthatna dang dawn tur nei ve lote chuan he scheme hnuaiah hian tanpuina Rs 5,000/- an dawng thei a. He scheme hnuaia hmathatna dawng tur chuan anganwadi centre-ah inchhinchhiahtir a, Mother-Child Protection (MCP) Card neih a ngai thung.