Vawiin khan Mizoram hmun dang rualin Champhai District Hospital tualzawlah Zenghri danna beihpui (IPPI) thlak tan a ni.

He hun hi  Dr. R. Lianmawia, District Immunization Officer (DIO) chuan kaihhruaiin  zeng hri danna chu kum tin naupang kum 5 chin hnuailamte hnenah vawi 2 pek thin anih thu sawiin, kuminah erawh chuan vawi 1 chauh pek an nih tur thu a tarlang a ni. District Immunization Officer  chuan India ramah kum 2014 khan  Zenghri   umbo a nih thu leh India ram chu Zenghri awm tawh lohna rama chhal a lo ni tawh a ni, a ti a. Ram thenawmah  hrang hrangah Zenghri a len thung avangin lo invenna atan vawiin thlengin zenghri danna hi naupang kum 5 hnuailam te hnenah pek a la nih thu a sawi a. Pu R.Lianmawia chuan nau pian tirhah he hri danna hi pek thin ni tho mahse he hun hi chu International Pulse Polio Immunization Day puala a bik taka pek a nih thu sawiin naupang kum 5 hnuailam mi 13924 te hnenah pek tum a nih thu a sawi bawk.

He hunah hian Pi WC Zorammawii DPO, Social Welfare Department chuan Zenghri danna beihpui (IPPI) hawnna neiin naupang kum 5 chin hnuailamte hnenah Zenghri danna (Polio Vaccine) a pe nghal a, a ni bakah hian Dr. Zatluanga,  District Medical Superintendent pawhin Vaccine hi a pe bawk a ni

Inkhawm tawi hman zawh anih atangin Champhai District chhunga khaw tinah zenghri danna beihpui hi neih tan nghal a ni a. Champhai District chhungah Booth hrang hrang 150 siamin Sub-Centre-ah leh Anganwadi-ah te he vaccine hi an pe a, heng Booth siama kal ve lo leh Vaccine la ve lo te chu zawn chhuah a, an chennaah kalchilh a Vaccine hi pek vek tum a ni.