Vawiin chawhnu khan Lunglei DC leh District Election Officer (DEO) Pi K. Lalrinzuali hovin a Office Chamber-ah pianphunga rualbanloten (PWD) awlsam zawka vote an thlak theihna tura ruahmanna hrang hrang siam tul te ngaihtuah turin meeting neih a ni. He hunah hian a kaihhnawih sawrkar official-te leh YMA Sub Hqrs President Pu Lalrotluanga an tel.

Lunglei DC Pi K. Lalrinzuali chuan pianphunga rualbanlo te thleng phak inthlanna neih hi ECI duh dan a nih thu sawiin India chu democracy a nih angin mipui aiawh tur thlannaah khua leh tui kum 18 chin chunglam, pianphunga rualbanlote leh kawng danga vanduaite pawh vote thlak vek turin ECI in a duh a ni, a ti a.  Lunglei District huamchhungah Polling Station 188 awmin heng zinga polling station 174 ah te ramp a awm thu sawiin ramp awm lohna polling station 14-ah te pawh thing hmanga Temporary Ramp siam tura hmalak a nih thu a sawi. Lok Sabha inthlan kan hmachhawn mai turah Lunglei District chu Voter Turnout that berna District leh District entawntlak ni thei tura tan lak a tum thu sawiin tlawmngai pawlte leh khawtlang hruaitute thawhho puiah a sawm.

YMA Sub Hqrs Lunglei President Pu Lalrotluanga pawhin thu sawiin Lunglei District-in inthlanna muanawm leh felfai tak kan neih leh ngei theihna turin YMA in theihtawp a chhuah dawn a ni, a ti a. Mizoram Assembly Election neih zawh taka Polling Station tina pianphunga rualbanlote leh kum lama upate lo pui tura YMA member tlawmngai (volunteer) an in ruat ang bawkin Lok Sabha Election ah pawh Volunteer ruat leh an tum thu a sawi.

Meeting-ah hian pianphunga rualbanlote tana ‘Special Awareness Campaign’ kalpui dan tur te, Inthlan Ni (polling day) a an hman tur motor ruahman dan tur te, a tul anga wheelchair ruahman dan tur te leh thil pawimawh dangte sawiho a ni.