Champhai DC Pu H. Lalengmawia kaihhruaina hnuaiah Champhai District chhunga zirna beihpui thlakna kal zel chu vawiin chawhnu khan Govt. GM High School-ah neih a ni a. He hunah hian DC chuan zirna chu hnathawh chi khat, nakina thawhrah sengna tur anih thu sawiin,  thawhrimna, taimakna leh tumruhna tello chuan hlawhtlinna neih theih anih loh thu a sawi.

DC Pu H. Lalengmawia chuan mitinin theihna bik Pathian in min pek te hai chhuak a, nun kawng dik zawh thiam apiangin hlawhtlinna an neih thin thu a sawi a.  Mi thatchhia leh dawrawmten hlawhtlinna tlang an chuang chhuak ngai loh tih sawiin, zirna beihpui thlakna kal zelah zirtirtu inthlahdah leh mahni hna ngaihthahte dap chhuah an nih tur thu leh mahni hna a inpe leh zual tura fuih an nih tur thu a sawi a. Faina beihpui thlakna kal mekah zirlai tinte chu khawlai a bawlhhlawh thenfai hna thawk turin a chah bawk.

He hunah hian Champhai Addl. SP Pu VL Lura Hauzel, Champhai DEO Pu C. Ralliana leh 10 Assam Rifles Major B.K Singh-te pawhin zirlaite fuihna thu tha tak tak tarlangin, zirna kawnga an kal zelna tur thlang thiam tur leh tum mumal tak nei a zirna kalpui turin an chah bawk.  He zirna beihpui thlakna hun hi Govt. GM High School Headmaster Pu C. Lalbuatsaiha'n a kaihruai a ni.