Vawiin chawhma dar 11:00 khan  Serchhip DC Conference Hall-ah Swachh Bharat (Urban) hawnna inkhawm neih a ni a, Serchhip District Bawrhsap Pi Juhi Mukherjee, IAS chuan khuallian niin he hun hi a hmanpui.

Bawrhsap Pi Juhi Mukherjee chuan faina kawnga hmasawnna tura sawrkar laipui hmalakna chu thil tha tak a nih thu a sawi a, Swachh Abhiyan hmanga inthiarna siamte pawh mimal tan mai nilovin vantlang tana siam chhoh tum mek a ni a, mahse kan ramah chuan a enkawlna tur tui supply lamah harsatna kan la tawh thu sawiin, thuneitu ten hma an lak dan tur ngaihtuah thei se a tih thu a sawi. Vawiina Swachh Bharat (Urban) hawn tak hi a hlawhtlinna turin mitinin mawhphurhna kan nei a, kan tihtur theuhte tha taka kan tih a ngai a ni a ti. Urban Area-ah chuan kan hnawmhnawk zingah tawih ral thei lo, Plastic kaihhnawih ho hi kan harsatna a ni a, chuvangin tawihral thei thilte hmang uar ila, lei thaa chantir theihte chu lei thaa chan tir zelin kan hnawmhnawkte hnawksak lova siamin kan ram hi ram nuamah siam ila, Swachh Bharat kharna neih hun kum 2019 ah chuan vawiina kan dinhmun nen khaikhina hmasawnna nasa tak nei turin theihtawp chhuah turin mipuite a chah a ni.

Pu ST Lalhmingmawia, Sanitation Officer in Swachh Bharat chungchang sawifiahin, India ram pumah mi maktaduai 7.90 velin inthiarna mumal an la nei lova, kan khawsak phungah leh kan bawlhhlawh sawngbawl danah te hmasawnna tur tam tak kan la neih avangin sawrkar laipui chuan ruahmanna a rawn siam a, kum 2019 ah chuan ram puma kan fai tawh beisei a ni a ti a. Swachh Bharat chu UD&PA Department enkawlna hnuaia kalpui niin, Serchhip District chhungah khaw pathum- Serchhip, Thenzawl leh N.Vanlaiphaite hi kalpui a ni a, thingtlang khawte zawkah te chuan PHED ten hma an la a ni a ti.

Kan bawlhhlawhte mumal zawka kan sawngbawlna tur Chhiahtlangah hmun neih tawh a ni a, DPR pawh siam fel vek a ni tawh niin, hmalak tan thuai theih an beisei thu a sawi bawk. Serchhip khawpui chhunga hman turin – Community Toilet 19, Public Toilet 57 leh Integrated Low Cost Sanitation (ILCS) 20 awm turin ruahman siam a ni a ti bawk.

Pu L. Rinliana, SDO(S) chuan Swachh Bharat Ambassador atan Pu Lalhmangaiha Chawngthu ruat anih thu puangin, Pu Lalhmangaiha Chawngthu hian Serchhipa faina kawnga hma lak a lo nih tawh dan te a sawi nghal a ni.

He inkhawm hi Pu Roluahpuia, President Joint Village Council, Serchhip chuan a kaihruaia, Swachh Bharat hmalakna atana intihsiakna hrang hrang neih turte a puang nghal a, Sawrkar Department hotute, tlawmngai pawl hruaitute leh zirlai naupang thahnem takin he hun hi an hmang a, Swachh Bharat thutiam an sawi  rual bawk a ni.