Sorkar hmalakna puanzar kawnga hma thar lakna atan NLUP Implementing Board leh Information & Public Relations department ten tun hnaia Doordarshan Aizawl nen thawh hona tura ruahmanna an siam chungchang ah vawiin khan NLUP Implementing Board (NIB)Vice Chairman Pu P.L.Thanga hovin I&PR department hotute leh district officer te, NIB officer te nen NIB conference hall-ah an thu khawm a. Sorkar flagship programme bakah district hrang hranga sorkar-in hmasawnna hna a thawh te chipchiar zawka mipui ten an hriat theihna tura programme kalpui dan tur te, hemi atana district IPRO te hman tangkai na tur leh NIB leh I&PR thawh dunna tura thil pawimawh te sawiho a ni.
Meeting kaihruaitu Pu PL Thanga chuan thu hma sawiin Chief Minister-in sorkar kalphungah langtlang taka mipui ten sorkar hmalakna te an hmuh chu a ngai pawimawh tih sawiin tuna DDK Aizawl nen I&PR leh NIB ten kar khata vawi khat programme nei tura ruahmanna thuthlung an ziah chu Chief Minister hmalakna leh thahnem ngaihna avang liau liau a ni, a ti a. He programme hmang hian Mizoram Sawrkar Flagship programme NLUP leh Mizoram chhung District hrang hranga Sawrkar Department hrang hrangte hmasawnna project kalpui anih dan te uar lehzuala puanzar tum ani a ti. NLUP hmalakna te Sawrkar Laipuiin a bengkhawn thu leh tunah pawh NITI Aayog website a tarlang tura tih an nih thu sawilangin hei hi update reng a ngaih dawn avangin I&PR Department tan pawh nasa lehzuala tan lak mar reng a ngai dawn tih a sawi a, DIPRO te chu field a thawk tak tak tu an nih avangin thiamna bik nei an ni a, an thiamna leh remhriatna te sorkar-in hman tangkai a tum tih a sawi bawk a ni.
NIB leh I&PR Department hmalakna kalphung thar ah hian District tinah District Bawrhsap Chairman na hnuaiah District-level Media Committee din tur a ni a, District Information & Public Relations Officer te member-secretary an ni ang a, District chhunga NLUP Line department te bakah Development Project khawih Department hrang hrang enkawltute member an ni ang a, Department chhunga NLUP hmasawnna hrang hrang bakah Department hrang hrang hmasawnna hna thawh te a hmunah uluk taka zirchiangin heng te hi mipui hmuh theih turin DDK ah tarlan thin a ni dawn a. NIB leh DDK ten MoU an lo ziah tawh angin I&PR Department chuan reilote ah DDK, Aizawl ah hian kartin zirtawp zan dar 7:00 – 8:00 inkarah “Mizoram Today” programme a ti chhuak ang a; he hunah hian NLUP hmasawnna hrang hrang bakah District chhunga Department hrang hrang te development project kalpui anih dan te tarlan thin ani dawn a ni.
Vawiin thutkhawmah hian I&PR Secretary, Pi Rosangpuii, Director Pu Jim K Chozah, NIB Secretary Pu James Lalrinchhana, NIB Chief Media Officer Pu David L. Thangliana bakah I&PR Department hotute leh District hrang hrang a DIPRO te an tel kim hle a ni.
