215/2023-2024

Champhai, the 26th April, 2023: Mizoram Board of School Education (MBSE) buatsaihin nimin khan Champhaia High School leh Higher Secondary School Zirtirtute tan capacity building of teachers in setting HOTS Question tih thupui hmangin Education Training Hall, Champhaiah training buatsaih a ni.

Pu C. Laldinpuia, Senior Academic Officer chuan Question pangngai set chu khawi hmunah pawh an thiam vek a, hots question set thiam a pawimawh avangin he hun hi buatsaih a nih thu a sawi a, zirlai te chherchhuak tura hnathawk an nih avangin zelthel tak leh zawmthaw taka thawk tur an ni lo tih a sawi a, mark pek chungchangah pawh dik taka pek a tul tih a sawi a, District thenkhatah dik tawk lova mark pek a awm thin thu tarlangin Training a hawng a ni.

He hun hi Pu H.Lalengzama, HEO chuan hun kaihhruaiin Zirlai naupangte hma hun tur atana thawktu an nih angin zirtirna kawnga hma an sawn theihna tura he hun training hi tangkai pui turin duhsakna a hlan a. Pu H.Lalhminghlua, Addl. DPC Samagra chuan MBSE hmalakna chue a theuneu lo hle tih a sawi a, NEP 2020 sawrkar laipuiin a duan chhuahna ang taka hman a nih theihna tura kalkhawmte mawhphurhna a tarlang a ni.

He training-ah hian Champhai District chhunga MBSE Affilianted High School leh Higher Secondary School zirtirtute kohkhawm an ni a, Capacity Building of Teachers in Setting Higher Order Thingking Skills (HOTS) tih thupui hmangin ni khat awh turin buatsaih a ni. He training ah hian Dr. Jonathan Lalrinmawia, Academic Officer hnen atangin National Education Policy (NEP) - 2020 chungchangte, Class IX leh X Science leh Mathematics bilingual textbook chungchangte zau taka ngaihthlak a ni a. MBSE in Scheme of Examinations and Question Design a hman mek, Integrated Evaluation Schemes (IES) leh application software chungchang inhrilh thar lehna hun hman nghal a ni.

MBSE chuan kum 2020 HSLC leh HSSLC exam atang khan exam dan kalphung leh zawhna zawh dan thar a hmang tan a, hemi hian a tum ber chu content-based question atanga competency-based question tam zawk zirlai naupangte tana chhawpchhuah niin, hemi atan hian District 11-a zirtirtute tan training 'Question setting Technique' tih thupui hmangin buatsaih a ni tawh a ni. Training buatsaihin a tum ber chu zirtirtu Term exam leh Board exam buatsaih thin te tan HOTS question chu eng ang nge a nih tih leh a buatsaih dan zirho a ni a, training hi session 2 a then niin session hmasa zawkah chuan Bloom Taxonomy atangin Lower Order thingking skills (LOTS) leh HOTS question buatsaih a ni. Rote Memorization emaw LOTS hmanna lam hawi ringawt zawhna ni lo, higher order thingking skills lam haw, naupangten an ngaihtuahna tun aia an sen lehzualna tur hi NEP-2020 rawn chhuak pawhin a ngaihpawimawh avanign training hi District hrang hrang MBSE affiliated school tan buatsaih vek a ni ang.

Training-ah hian Champhai District chhunga High School leh Higher Secondary School zirtirtute an tel tha hle a ni.