2270/2022-2023
Champhai, the 11th October, 2022: Central Young Mizo Association (CYMA) leh Mizoram State AIDS Control Society (MSACS) te tangkawp buatsaih, HIV/AIDS hluar zel dona tura hmalakna, 'Zoram Harh Rawh Campaign' tih thupui kaltlanga Mizo hnam lam (folk dance) leh hla (folk song) hmanga Branch YMA te tana intihsiakna neih dan tur chungchang relin vawiin chawhnu dar 1 khan Champhai District Level Organising Committee chu an Chairman Pu James Lalrinchhana, District Bawrhsap hovin DC Conference Hall-ah an thukhawm.

District Bawrhsap chuan HIV/AIDS do kawngah tha thlah lova tanrual angaih thu sawiin, Sawrkar, NGO leh Kohhrante tanrual a tul hle a ni, a ti a. A tak taka ngaihven a tul tawh thu sawiin, ram leh hnam him nante, nakin zela tu leh fate dam khawchhuah nan ngaihtuahna kan sen a tul a ni, a ti bawk.

Meeting chuan Zoram Harh Rawh Campaign Intihsiakna chu November ni 15-19, 2022 chhungin neih hman nise a ti a. District Organizing Committee-te tan District Advocacy Programme buatsaih nise tih a ni bawk a. HIV/AIDS chungchang inzirtirna lehkha chhiarchhuah tur Kohhran hrang hrangahte peka a tul anga puangzar tura ngenna siam nise tih a ni a. Hnam lam leh zai intihsiaknaah YMA Branch te tel vek tura hmalak ni se tih niin, hemi kawnga hma la tur leh intihsiakna huaihawt dan turte ruahman turin Sub-Hqrs YMA Champhai ruat a ni a, tel thei turte chu October thla chhunga in hriattir hman vek tura hriattir nise tih a ni a. Ruihhlo leh HIV chungchang inzirtirna zau zawka neihna tur publicity campaign neih nise tih niin, sub-commitee ruat a ni a, zoram harh rawh campaign neih tur inhrilhhriatna zau zawk neih dan turte pawh sawiho a ni bawk.

Mizo hnam lam leh Folk song hmanga intihsiakna, 'Zoram Harh Rawh Campaign' kaltlang intihsiakna hi hnam lam leh hlate hmangin neih a ni dawn a. He huna telte tan hian HIV/AIDS Awareness Campaign neih thin a ni bawk ang. November ni 4 ah thutkhawm leh nise, ruahmanna kimchang leh report-te thlirho a program kimchang siam nise tih a ni bawk.

Intihsiakna hi District Level-ah November ni 15-19,2022 leh State Level-ah December ni 1, 2022 hian neih tura ruahman a ni a. District Level bikah hian pakhatnain Rs. 50,000/-, pahnihnain Rs. 30,000/- leh pathumnain Rs.10,000/- te an dawng dawn a. Heng bakah hian Branch 2 tan Consolation Prize Rs. 5,000/- leh tel dangte participation prize Rs. 1,000/- sem an ni bawk ang.