2271/2022-2023

Khuangchawi thla ni 11, 2022: Vawiin khan Lawngtlai Bazar Venga Dokulha Hall-ah National Handloom Development Programme (NHDP) kal tlanga Mizoram Handloom & Handicrafts Development Corporation Ltd (ZOHANDCO) buatsaih State Handloom Expo 2022 chu Lai Autonomous District Council (LADC)-a Chief Executive Member Pu V. Zirsanga'n a hawng.

Pu V. Zirsanga chuan ZOHANDCO hma laknaa Mizoram chhunga kut themthiam leh la deh thiamte tana eizawnna kawng hawn zau zel a ni chu lawmawm a tih thu sawiin, an hna thawh chu kut hna thawh chawi sanna leh hnam ziarang humhalhna pawimawh tak a ni, a ti a. Mihring thiamna, thahrui leh hun tam tak sen a ṭul avangin hnam changkang apiangin kuta thil siam an ngaisang tih sawiin, puan tah leh kut themthiam thil siam chhuah kawngah mahni intodelh mai ni lo va, ram danga thawn chhuah tham leh thawn chhuah tlak neih tum turin puan tahtu kal khawmte chu a chah a. Hnam nihna chu thisenah awmin, a lan chhuahna langsar ber erawh ṭawng leh inthuamnaah a ni tih sawiin, inthuamnaah mahni hnam ziarang tar lan uar deuh deuh tur leh hnam ze mawi tak tak chu inthuamnaah chauh tar lang lo va, a taka nunpui tum ṭheuh turin kal khawmte chu a chah a ni.

ZOHANDCO Chairman Pu C. Lalrammawia chuan sawrkarin a ṭulna leh pawimawhna a hriat avangin ZOHANDCO tihtawp tawh chu tharthawh lehin, tunah chuan ṭhangduang takin hma lakna hrang hrang an kalpui mek tih sawiin, Handloom leh Handicrafts lama ZOHANDCO-in hma lakna an kalpui dan hrang hrang a tar lang a. A ṭhan zel nana mawh phurtu chu Mizoram mipuite an nih thu sawiin, mahni hnam thil ngaihhlut leh ngaihsan nachang hriat thar deuh deuh a pawimawh thu a sawi a. Mizo thiamhnang deh thiam leh la deh thiamte khawvel hmun zau zawka an inpho chhuah theihna tur kawng hrang hrang dapa hma an lak chhoh zel tur thu a sawi a ni.

Lawngtlaia ni 4 awh tur State Handloom Expo 2022 buatsaih hawnna hun hi ZOHANDCO Manager Pu C. Lalrinmawia chuan kaihruaiin, kal khawmte lawmna thu a sawi a. Rev. K. Zalawma'n hunserh hmangin, ZOHANDCO Board of Director Pu Thangrenga pawhin thu a sawi a. ZOHANDCO Board of Director Pu VL Chhuanga Chhangte leh Assistant Manager Pi C. Lalmuanpuii te'n sawm bikte hnena thilpek hlanna hun huaihawtin, Assistant Manager Pu Rodingluaia'n lawm thu sawiin hun a khar a ni.

Lawngtlaia State Handloom Expo 2022 hawnna hi LADC-a Chairman Pu VL Hmuaka bakah, Executive Member-te, office holder-te leh MDC-te, sawrkar official-te, tlawmngai pawl ai awh, political party ai awh, thu thar theh darhtu, puan tahtu leh mipui ṭhahnem takin an chhim a. Hun hman zawh hian Khuallian leh official-te chuan dawr (stall) hrang hrang an fang kual a, mipui tan dawr theihin hawn zui nghal a ni.

October ni 11 aṭanga ni 14, 2022 chhung awh tur State Handloom Expo-ah hian dawr 31 hawn niin, he'ng dawrahte hian Mizoram hmun hrang hrang aṭangin tualchhuak puan leh thawmhnaw lam bakah, kut themthiam thil siamte man tlawm zawkin zawrh chhuah a ni.

ZOHANDCO hma lakna hian kum 2019-20 khan Aizawl, Saitual leh Hnahthialah te Special Handloom Expo buatsaih niin, kum 2020-21 chhung khan Aizawl leh Lawngtlaiah National Handloom Expo buatsaih a lo ni tawh bawk a. Kum 2020-21 chhung vek khan Lunglei, Siaha, Champhai leh Serchhipah te Special Handloom Expo kalpui leh niin, kum 2021-22 chhung khan Kolasib, Aizawl leh Mamitah te State Handloom Expo hi buatsaih a ni bawk a. Kum 2022-23 kum kal mekah hian Khawzawl leh Lawngtlaiah te State Handloom Expo hi buatsaih leh tawh niin, Hnahthialah pawh kumin chhung hian buatsaih leh tumin ruahmanna kalpui mek a ni.