2272/2022-2023
Aizawl, the 11th October, 2022: Vawiin chawhnu khan kum 2021, February ni 25-a Kepran khua lo halnaa vanduaina tawka nunna chan ta, Pu Zamawia (L) chhungte hnenah EF&CC Minister Pu T.J. Lalnuntluanga chuan Environment, Forest & Climate Change Department kaltlangin ralna sumfai a hlan.

Kepran khaw lo halnaa nunna chan ta, Pu Zamawia (L) ralna hun hi EF&CC Minister, Pu T.J. Lalnuntluanga Office Chamber-ah hman a ni a. Ralna sumfai Rs. 2,00,000/- (cheng nuai hnih) hi EF&CC Minister, Pu T.J. Lalnuntluanga chuan Pu Zamawia (L) fapa, Pu K. Lalbiakhluna hnenah a hlan a ni.

Pu Zamawia (L) ralna inkhawmah hian EF&CC Minister chuan thu sawiin, kangmei avanga nunna chan chhungkua Mizoram sawrkarin a tuarpui tak zet thu sawiin, thil buaipui fel ngai tam tak a awm avangin a puala hun hman lawk theih a nih lohnaah chhiat tawk chhungkuate hriatthiamna Sawrkar aiawhin a ngen a. Pu Zamawia puala hun hman a nih chungchangah bialtu MLA leh Minister ni bawk, Pu Lalchhandama Ralte thahnemngaihna leh Department hotute inpekna fakawm a tih thu a sawi bawk.

Pu Zamawia (L) ralna inkhawmah hian DFO, Darlawn Forest Division Pu Lalnunsanga Khawlhring, IFS bakah EF&CC Department Official dang ten Minister hi an tawiawm a ni.