2545/2022-2023
Champhai, the 4th November, 2022: Central Young Mizo Association (CYMA) leh Mizoram State AIDS Control Society (MSACS) te bultuma HIV/AIDS hluar zel tur dona kawnga hmalakna, 'Zoram Harh Rawh Campaign' kaltlanga Branch YMA te tana Mizo hnam lam leh hnam zai hmanga intihsiakna neih tur buaipuitu, Champhai District Level Organising Committee on Zoram Harh Rawh chu vawiin chawhma dar 11 khan an Chairman Pu James Lalrinchhana, District Bawrhsap hovin DC Conference Hall-ah an thukhawm.

District Bawrhsap Pu James Lalrinchhana chuan Zoram Harh Rawh Campaign thil tum tlangpuite tarlangin, mipui huapzo HIV/AIDS chungchang inzirtirna kalpui tura hmalakna, ram leh hnam himna leh damkhawchhuahna tura pawimawh tak a ni, a ti a. Hlawhtling taka kalpui a nih theih nan hmalaknate puanzar leh inhriatpuitawna, inrawntlan zel a pawimawh thu a sawi bawk a. Kalkhawmte leh mawhphurhna hrang hrang neite chu theihtawp chhuah chhunzawm zel turin a chah a ni.

He hunah hian hmalak tawh dante ngaihthlak niin, program neih dan tur kalhmangte leh HIV/AIDS chungchang inzirtirna zau zawk kalpui dan tur chungchangte sawiho a ni a. Thukhawm chuan Zoram Harh Rawh Campaign kaltlanga hnam lam leh zai intihsiakna chu Champhai District-ah November ni 17 leh ni 18, 2022 ahte Kahrawt Field leh Community Hall-ahte neih ni se a ti a. November ni 17, 2022 ah a hawnna, awareness campaign leh hnam lam hmanga intihsiakna neih ni se, a ni hnihna November ni 18, 2022 ah hnam hla hmanga intihsiakna leh kharna hun buatsaih ni se an ti a. Program kimchang duanga tul dangte buaipui turin Sub-Hqrs YMA Champhai chu ruat niin, November ni 14, 2022 ah thukhawm leh ni se an ti a ni.

Mizo hnam lam intihsiakna turin Cheraw (Kantluang) leh Khuallam te thlan a ni a, hla hmanga intihsiakna turin Darmani Zai chu hla intawm atana thlan a ni a, heng bakah hian Lianrikhumi Zai, Awithangpa Tlawh Zai, Labour V Force Zai leh Domangi Zai te zinga duh ber pakhat thlanga zai tur a ni dawn bawk a. Hla hi chang thum thleng sak tur niin, hemi zai thluk hmanga hla awmsa emaw, thupui HIV/AIDS dona lam hawia hla phuah chawp leh cheimawite hman phal a ni. He huna telte tan hian HIV/AIDS Awareness Campaign leh mahni inhrechiang duhte tan thisen test neih theih a ni dawn a, media lamahte hmalaknate thlir theiha pholan thin a ni dawn bawk. Vawiin thlengin Zoram Harh Rawh Campaign intihsiaknaa tel tura inhriattir tawh YMA Branch 5; Zotlang, Venglai, Kahrawt, Vengthlang leh Vengthar te an awm tawh a ni.

District Level-a tithate tan State level intihsiakna December ni 1, 2022 hian neih tura ruahman a ni a. District bikah hian pakhatnain Rs. 50,000/-, pahnihnain Rs. 30,000/- leh pathumnain Rs.10,000/- te an dawng dawn a. Heng bakah hian Branch 2 tan Consolation Prize Rs. 5,000/- leh a tel dangte participation prize Rs. 1,000/- sem an ni bawk ang.

Zoram Harh Rawh Campaign-in a tum ber chu mipuite HIV/AIDS chungchang ngun taka zirtir a ni a. HIV laka inven dan leh inven nachang an lo hriata kan rama HIV a darh zel loh nana ruahman a ni a. Heng bakah hian a vei mekte'n enkawlna tha dawn a pawimawhzia an hriata, inenkawlna dawng tura inenkawlna hmun pan nachang an hriat theih nan te, HIV kai thei dinhmuna dingte'n an dinhmun dik tak an hriat theih nana thisen test-na hmun kawhhmuh leh mahni dinhmun inhriatchian pawimawhna leh thatnate zirtir a ni.