Chief Minister Lal Thanhawla chuan 'chanchinbu hian mipuite thudik a hriattir hian ram a him a  ni' a ti. He thu hi vawiina Mizoram Journalists' Association General Conference vawi 38-na I&PR Auditoriuma neihah a sawi a ni.

Chief Minister chuan chanchinbu a enkawl ve hunlaia a tawnhriate sawiin, typewriter leh Cyclosestyle khawl neih chuan chanchinbu a chhuah theih mai a, amaherawhchu press mi nih hrim hrim hi a namai lo hle a, mi nazawng aia chung nih angai a ni a ti. Tunlaiah chuan internet hmangin khawvel hmuntina thil thleng  a chhuah chhawn zung zung theih tawh a, hetah hian mipui tana tha tur leh tangkaipui tur thlir thiam a tul hle a ni a ti a. Zalenna zau tak kan neih hi journalism ethics ngaipawimawh chunga fimkhur taka kan hman chuan hmasawnna tam tak a chhuah thei a ni a ti.

Press mite chu intuaihriam reng tura chahin Chief Minister chuan mipui ten thudik an hriat hi an bat a ni tiin,thil thleng reng reng hi finfiah hmasak fo a tul a, thubelhchian dawllo lakah kan fimkhur tur a ni a ti.Press chu mipuite thudik hriattirtu, thudik sawifiah, atul huna mipuite aiawh te,a tha zawnga thil chik mi nih leh mi hnuaihnung zawkte khaichhuah a ni a ti a. Chuvangin quality lamah tan la a, thudik kan chhuah phawt chuan zawi zawiin chhiartu an pung zel thei a ni a ti. Editorial te hi mipui leh sorkar zirtir nei thei lam ziah thin nise a duhthu a sawi bawk.

Chief Minister chuan state te reuhte nimahila media lamah kan thang nasa hle nia a hriatthu a sawi a. Mihring tam lam tehna atang pawhin chanchinbu ngah ber state kan ni awm e a ti a, accredited journalists pawh angah ber kan nia a hriatthu a sawi bawk a ni. Mizoram leilung fate hian kan tih theih leh kan tih tur dik tak kan tih chuan midang tan inhlawhna a chep anga, tumah an lo luh duh a rin loh thu a sawi nawn bawk.

MJA General Conference ah hian Prominent Journalist a thlan Pu Lalbiakthanga Pachuau, Editor Zoram Tlangau hnenah lawmpuina thilpek Chief Minister hian a hlan a. Prominent Journalist Award Rs.10,000/- Pu Jim K.Chozah, Director,I&PR in a hlan bawk a ni. Report ngaihthlak atangin Mizorama MJA member zawng zawng chu 228 an ni a, Nitin chanchinbu 91 , Karlaka (periodical) chhuak 14 leh Cable TV 15 a awm a. Press Club hi Aizawl bakah Lunglei, Saiha leh Lawngtlai ah te a awm bawk a ni.Tuna sum la neih zat report chu Rs.2,31,690 /- a ni.

Conference hi Pu Vanlalrema Vantawl, Vice President, MJA in a kaihruai a, Chawhnu lamah MJA President Pu Zosangliana kaihruaina hnuaiah rorel na neih a ni.