Cheng nuai 148 man Vaivakawn Police Station building thar chu vawiin khan Home Minister Pu R.Lalzirliana'n a hawng.
Vaivakawn Police Station hi kum 1973 khan Outpost a bul tanin kum July ni 4, 2009 khan Police Station puitlinga hlan a ni a. Hun rei tak mi in luah hawha an awm hnu in vawiin khan an building tharah hian insuan lutin Officer-in-Charge, Inspector  hovin thawktu mi 49 an awm a. He building ah hian thawktu chhungkaw 7 chenna tur quarter a awm thei nghal bawk a ni.

Hawnna inkhawmah thu sawiin Home Minister chuan Mizoram Police te chu mipuiin an thlamuan puiin an chungah rinna an nghat lian hle tih a sawi a. Police department thuam that nan leh tihchak nan kawng hrang hranga hma lak a nih thu tarlangin Home Minister chuan dan leh thupek kenkawhna kawnga police te hna pangngai bakah Forensic science lamah te, Fire & Emergency Service ah te, thawktute hmalakna a lang chho zel chu lawmawm a tih thu a sawi a. Police department chu mihring buaipuitu an nih avangin department tam zawk nen an hna kalphung a inang lo tih sawiin Home Minister chuan police te chu duhthawhna avanga anmahni sawiselna media lama lo lang thin te chu hnual phah nan hmang lo turin a fuih a. Thudik tan a, dikna hailang tura tih tak zeta beitute chu officer chhuanawm ber an ni, a ti.

Vaivakawn Police Station building thar hawnna inkhawm kaihruaitu Pu Saizela IPS, DIG(Hqrs)chuan Aizawl tlak lam veng thahnem tak huamtu Vaivakawn Police Station in mahni puala building thar an nei ta chu Aizawl tlak lam vengte tan mel lung pawimawh tak a ni, tiin he building thar nei tur leh Outpost atanga Police Station puitlinga dah tura sorkar hmalakna ah lawmthu a sawi a.

Pu Lalrokhuma Pachuau DGP pawhin thu sawiin kawng hrang hranga Police department hmasawnna leh misual hnu chhui chhuah kawnga tun hnaia police te hlawhtlinna langsar deuh deuh, IR sipai ten Bolero motor rukbo Silchar kawnga an man chhuah dan leh Bawngkawn-a sorkar document lem siamtute man chhuah an nih dan te a tarlang a. Pu Lalbiakthanga Khiangte Aizawl S.P chuan lawmthu sawiin hun hnung a khar a ni.