Chief Minister Lal Thanhawla chuan chanchinbumite hian midangte thuchhuah leh sawichhawna innghat mai lo in, mahni ngeiin thu hrechiang tura taimak an chhuah hle a ngai a ni a ti. He thu hi nimin tlaia Serchhip Vengchunga Local Cable TV Operator ‘TJ & M Vision Cable Network’ a hawnna a a sawi a ni.

Chief Minister chuan media hi zirlaite kaihruaitu pawimawh tak an ni tiin, hriselna tha nei tura kan tih tur leh tih loh turah te, ramngaw leh nungcha humhalh chungchangah te leh thildang tam takah naupan tet lai atanga an zir leh hriat theih tura thu leh hmuh theiha an chhuah hian nasa takin hmasawnna an hmu thei a ni a ti a. Hetiang lam hawi zawnga TJ&M Vision in zirlaite zirtira, an tangkaipui theih tur leh kaihruai thei tur channel an pe chhuak hi a lawmawm tak meuh a, zirlai naupangte pawhin an hlawkpui ngei a beiseiawm a ni a ti.

He cable operator TJ & M Vision hian zirlaite tanpui thei tur channel 4 - primary zirlai, middle zirlai, high school zirlai te tan leh multipurpose channel a pechhuak a. Zirlai naupang ten an hun awl laia an thlir theih turin nitin darkar hnih chhung zel an tichhuak thin a ni.