Mizoram Football Association Cup 2013, a vawi 14-na Serchhip Khawte Tlang Field a khelh mek chu vawiin khan Final khelh a ni a, Chief Minister Pu Lal Thanhawla chuan a khar.

Kharna inkhawm buatsaihah Chief Minister chuan Serchhipah hlawhtling taka football tournament buatsaih a ni chu a lawmawm hle a ni a ti a. Infiammite chu field chhungah leh pawnah inthununna 'sportsman spirit' vawng reng tura chahin, theihtawp chhuah hi a pawimawh ber a ni a ti.

Chief Minister chuan tun hun hi thalaite hun a ni tiin, India mipui zawng zawng zahve hi thalaite an ni a, thalaite tan khawvel thar siam turin infiamna lamah te, zirna lamah te leh infiamna hmunhma buatsaih chungchangah te kan phak leh theih chinah theihtawpin hma kan la chho a ni a ti a. Talent cho chhuah tham an nei tih hriain, a haichhuak turin kawng hrang hrangin kan ngaihtuah chho mek zel a ni a ti. Hengte bakah hian training leh coaching lamah te international trainer leh coach te rawih thin an ni a ti. Pu Lal Thanhawla chuan heng kan hmalakna te ti hlawhtling tur hian infiammi te mai bakah sports leh games a tuimi te, sports administrator te an pawimawh a, mahni inthununna te, insum theihna te leh sim tur kan neihte sima kan fihlim hi a pawimawh hle a ni a ti.Olympic lo awm leh tur kum 2016 Brazilah Mizo thalai ten India ram aiawha pen chhuak thei ngei turin tunah hian Olympic vision 2016 siam tawh anih thu sawi bawkin, a hlawhtlinna turin sports administratorste leh infiammi te an pawimawh rualin incentive pawh siam chhoh mek zel a ni a ti.

MFA Cup 2013 hi ni 26 March 2013 khan khelh tan a ni a, team lut zawng zawng hi 14 an ni.An zingah  hian MPL Team atangin 6 leh a dang zawng chu district tina team te an ni. Vawina Final khel te hi Chanmari Football Club, Aizawl  leh Dinthar Football Club, Aizawl  te an ni a. Chanmari FC hian 2 – 0 a Dinthar FC hnehin an champion a. Champion Team hian trophy leh Rs.1 lakh an dawng a, runner-up in Rs. 35,000/- leh trophy an dawng bawk a. Semi fanalists ten Rs.15,000/-, Participation prize Rs.3000/- theuh an dawng bawk. Heng bakah hian Fair Play team Chanmari FC in Rs. 10,000/- dawngin, top scorer Rs.5,000/- leh best player tan Rs.5,000/- a awm bawk a ni.

Chief Minister a nupui Pi Lal Riliani bakah Pu K.Lianzuala, Chairman, KVI ten an tawiawm a ni.

Inkhelh zawh hian Chief Minister hian Serchhip Vengchunga Local TV TJ & M Vision Cable Network chu a hawng nghal a ni.