Information & Public Relations Department buatsaihin vawiin khan Mizoram chanchinbumite tan I&PR Auditorium-ah ‘Workshop on Preparation of State Plan & Budget’ neih a ni a. State Planning Board Vice-Chairman Pu Lalkhama IAS (Rtd) chuan Workshop a hawng a, Finance leh Planning Department-a officials ten chanchinbumite hi Plan leh Budget chungchangah zirtirna an pe a ni.

Workshop hawnna inkhawm Mizoram State Planning Board Adviser Pu Saihlira kaihhruaiah hian Pu Lalkhama chuan thu sawiin state plan leh budget hi hmasawnna hnuk a nih avangin uluk taka thlirho leh sawikhawm a tul thin a ni, a ti a. Sorkar hotuten engkim an hriat bik loh avangin anmahni hrilhhre tur leh finchhuah hi media te tih makmawh leh mawhphurhna lian tak a ni, a ti bawk. Tun hnuah sorkar chu awptu ni mai lovin mipuite rawngbawltu an nihna hi a langsar zawk tawh a, chuvangin sorkar reng reng chuan mipuite hamthatna lam leh hmasawnna kawnga an hruai luh dan tur (vision) chiang tak an neih a tul tawh a. Hmasawnna hna thawktu tak tak erawh sorkar hnathawkte an nih avangin media chuan an hna khawih chu dik tak leh chak takin an kalpui em tih an thlithlai a, mipuiten an tana sorkar ruahmanna hrang hrang an tangkaipui dan tur leh sorkarin a kalpui dan te hrilhhriat hi media mawhphurhna a ni, a ti.

MJA President Pu H. Zosangliana chuan chanchinbumite chu ram rawngbawltu an nih angin ram chhunga sum leh pai dinhmun bakah budget siamdan leh hmandan an hriatchian a tul a, mipuite hmasawnna atana sorkar ruahmanna hrang hrang awm te leh kalpui a nihdan an tarlang thin chuan mipuite lawm leh media chungah an innghahna pawh a ti zual thin a ni, a ti.

Vawiin Workshop-ah hian State Planning Board-a Sr. Research Officer Dr. Lalrinchhana’n State Plan chungchang a sawi a, State Planning Board Adviser Pu Lalhmachhuana Hrahsel-in Central Funding Agencies chungchang leh Addl. Secretary, Finance Department Pu Vanlalphena te chuan Budget chungchang zirtirna an pe a. Nimina MJA General Conference hmang tura Mizoram District 8 atanga chanchinbumi kalkhawmte pawhin he Workshop hi an hlut hle a, tel pawh an thahnem hle a ni. State Budget leh Plan chungchanga Paper hrang hrang sawihona leh zawhna leh chhanna hun hman a ni bawk. Information & Public Relations Director Pu Jim K. Chozah-in hunhnung khar nan lawmthu a sawi a ni.