Vawiin khan Education Minister Pu Lalsawta chuan Aizawl Press Club-ah SCERT in sikul pangai a lut thei lo, sikul bang ta te leh sikul kai lo naupangte tana sikul an kai leh theihna tura an kum mil a zirlaibu an buatsaih chu a tlangzarh. He programme ‘Release of Special Training Materials for Out of School Children’ tih hi Pu T Rohmingliana State Project Director Mizoram SSA Mission in a kaihruai a ni.

Pu Lalsawta chuan hetianga a bika zirlaibu siam, hman theiha a awm ta chu hun danglam tak leh la tih ngai loh thil a ni tiin hetiang zirlaibu peih hmasa berte zing ami kan ni chu thil chinchhiahtlak tak a ni a ti a. Zirlaibu buatsaihtu SCERT leh hemi kawnga hmalatu SSA leh MBSE te hnathawh chu a chhuanawm hle a ni tiin SSA awm hma leh awm hnu a zirna dinhmun khaikhin hian lang thei khawpin hmasawnna a thlengin a ni a ti.

Mizorama jail tang leh pawikhawitu, za zela 95 te chu zirna lamah matric hnuailam an nih thu tarlangin Minister hian zirna hi mahni tan chauha chakaikhawrhna nilovin khawtlang tan remna leh muanna tlentu leh midangte tana himna buatsaihtu a ni a ti a. Naupangte tana sikul kawng hawnsak hian an tan jail kawng kan kharsak ve thung thei a ni tiin tunlai khawvel thangchho mekah hian thil thar a tam avangin zirlaibu ennawn tul a hriat thu a sawi bawk.

He hunah hian MBSE Chairman thar Rev. Dr. Lalchungnunga pawhin thusawiin zirna chu missionary hna a ni a, inchuh zawnga kal lovin zirna mawhphurtu hrang hrang te chu thawk ho tur kan ni a ti. Pi Malsawmthangi, SCERT Director chuan zirlaibu buatsaih anih dan a sawi a, Vanlalchuani Khithie Coordinator, Alternative Schooling, SSA State Project Office chuan Special Course zirlaibu chungchanga hian Technical Report a pe bawk a. Special Course hi pawl I atang a pawl VII thleng a an zir tura buatsaih a ni a. Zirlai bu buatsaih te hi Mizo, English, leh Mathematics ah te pawl I atanga pawl VII thleng; Environmental Studies ah pawl III & IV; Science leh Social Science ah te pawl VI te an ni.

Sarva Shiksha Abhiyaan Right to Education Act 2009 a chhuah hnu hian naupang sikul kailo te ngaihsak dan tur leh enkawlna tur Dan thar a lo chhuak a. Hemi zulzuia naupang sikul kailo te’n an chanvo an chan theihna turin SSA Mission chuan ruahmanna a siam ve nghal a, naupang sikul kailo te’n an kum mil a sikul an kai theihna tur in naupangte tan Special training a siam a. Special Training ah hian naupang ten a rei lo berah thla thum leh a rei berah thla 24 an training tur a ni a, training chhuak te chu an kum milin an thutna class tur awmah sikul pangngaiah luh tir tur a ni. Mizoramah hian hetianga training neihna Residential Training Centre 48 leh Non-Residential Special Training Centre 19 a awm mek a ni.

Kum 2011 September leh November inkarah Mizoram puma naupang sikul kai lo chhiarpui neih a, naupang sikul kai lo (out of School children) 8221 chinchhiah a ni. Naupang sikul kailo tamna hi State ramri, a bikin Assam, Tripura atang te, Bangladesh leh Myanmar atang a lokal an tam ber a, hei hian literacy percentage pawh a tih hniam phah hle in hriat a ni.