Vawiin khan Rural Development Minister Pu R.Lalzirliana leh RD Department hotuten Aijal Club-ah chanchinthar lakhawmtute kawmin department hmalakna an hrilhfiah.
Pu R.Lalzirliana chuan Rural Development Department hi Mizoram mipui za a sawmli pasarih enkawltu an ni a, khawpuia pem luh kher ngai lova thingtlang miten eizawnna ngelnghet, hmasawnna rotling an neih theih nana tanpui chu a tum ber a ni, a ti. Hnathawktute hnathawh a tha a, an tang hle tiin chanchinthar lakhawmtute chu thil chhe lam chauh tarlang lova in tihchak tawnna leh mipuite ti phur thei tur zawnga thil tha pho chhuak tura an rin tawk thu a sawi a ni.
Rural Developement Department hian Centrally Sponsored Scheme (CSS) hrang hrang - Mahatma Gandhi National Rural Employment Guarantee Scheme (MGNREGA), Pradhan Mantri Awaaz Youhana (Grameen), Pradhan Mantri Krishi Sancha Yojana/ IWMP, Border Area Development Programme (BADP), National Rural Livelihood Mission (NRLM) leh State Training Institute (SIRD) hnuaiah hma a la a. Heng CSS bakah hian State Plan sum atangin Rural Housing Scheme (RHS) leh North Eastern Council (NEC), Non-Lapsable Central Pool of Resources (NLCPR) hnuaiah scheme hrang hrang a kalpui bawk.
Sawrkar kum 2015-2016 chhung khan Mizoram chu India ram pumah MGNREGS hnuaia hnathawh that (persondays generation)- ah pahnihna a ni.
Mizoram Rural Livelihoods Mission (MzSRLM) hi Kolasib leh Serchhip District-ah hmalak tan niin Self Help Group 742 din a ni tawh, Kum 2016-2017 chhungin Champhai District-a Khawbung leh Champhai Block, Mamit District a W.Phaileng leh Zawlnuam Block, Siaha District-a Tuipang Block leh Lawngtlai District a Sangau Block-ah te hma lak tum a ni.
IWMP ah kum 2016-2017 chhung atan Mizoram budget atangin cheng vaibelchhia 38.35 dah a ni a. Kum 2016-2017 chhunga Central Share dawn tur thawhkhatna chu hmuh thuai beisei a ni. Sum hmuh tawh zawng zawnga atanga tun thlenga achievement neih tawh zat chu 1,12,323.69 Ha. a ni a. IWMP hi leilunga kutthlak a nih avangin an thawhzat tehna achievement pawh hi ram zau zawng tehna Hectare (Ha.)-a dah a ni.
BADP hian ramri hrula RD Block 16-te a huam a. Tui thianghlim in tur leh ruahtui chhek khawlna tur RCC tank, community centre, zirna lam tih hmasawn nana ruhrel din, playfield, indoor stadium, auditorium, duty post, step, retaining wall leh thil dang chi hrang hrang siam hna thawh a ni. Rural Housing Scheme hmangin mi harsa te tan in chung tur rangva an neih theihna tur leh ruah tui awlsam zawka khawl theihna tur ruahmanna siam a ni a. SIRD hnuaiah training buatsaih thin a ni a, NEC hnuiah Flood Control & Irrigation of Potential area at Ngopa leh Chhanchhuahna Khawpuiah Aloe vera cultivation siama hmalak mek a ni. NLCPR hnuaiah E.Lungdar leh Khawbungah Mini Sports Complex, Saitualah Mini Shopping Complex sak hna thawh mek a ni.
Vawiin programme-ah hian R.D Under Secretary Pu Paul L.Khuma leh Khawzawl BDO Pu Lalrinzuala te’n an department hmalakna a lem nena entirin an sawi fiah a. Zawhna leh chhanna hun hman a nih hnuah RD Jt.Secretary Pi K.Lalrinzuali’n lawmthu sawiin hun a khar a ni.
