Vawiin chawhma dar 11:30 khan Mizoram Remote Sensing Application Centre (MIRSAC), Directorate of Science & Technology leh Geography Association of Mizoram (GAM) tangkawp chuan Aizawl-Lunglei road, Maubuang Lungsai vengah Tropic of Cancer-in Mizoram a tan tlangna lai ah hoarding tarin lung an phun.

Dr. RK Lallianthanga, Chief Scientific Officer leh Member Secretary, MIRSAC chuan tunlai khawvela kan awmna hmun dik tak hriatchian hi a pawimawh a. Hetianga Survey of India Topographical Map leh Geographical Positioning System (GPS) khawl tha tak hmanga Tropic of Cancer (23.5 Degree Latitude) in Aizawl to Lunglei kawnga Mizoram a tan tlangna lai hmun chhinchhiah leh mipui te hriat leh hmuh theih a tarchhuah a lo ni hi thil chhinchhiah tlak tak a ni tih a sawi.

Prof. Rintluanga Pachuau, Department of Geography, Mizoram University leh President, Geography Association of Mizoram (GAM) pawhin Tropic of Cancer pawimawhna leh nihphung a sawi a. Kum tin in a awmna tlem tlem a danglam thei a nih rualin map ah chuan a average-a lakin 23 Degree 30 minutes hi Tropic of Cancer degree atan dah leh pawm a nih thu chiang takin a hrilhfiah bawk.

Tropic of Cancer chhinchhiahna hawnna inkhawm hi Dr.R.Ramthara, Vice President, GAM in a kaihruai a. Dr. Lalnunsiama Colney, Principal Scientist, MIRSAC leh Dr. R.Ramthara, ten Tropic of Cancer in kalkawng a tan tlangna lai ah rawng an hnawih a. Dr. K.C.Lalmalsawmzauva, General Secretary, GAM in report pe in, lawmthu sawina hun a hmang. He hunah hian GAM member te, MIRSAC Scientist leh staff-te, Maubuang Lungsai veng khawtlang hruaitute an tel a ni.