Joint UN Inititatives hnuaia ILO hmalakna in Mizoram thil deh chhuah leh Mizoram atanga bungraw siam chhuah hmanga Myanmar, Bangladesh leh South East Asia ram thenkhat te nen insumdawn tawnna tura company hrang hrang te rawn inbun ve na tur chungchang sawihona meeting pawimawh tak chu vawiin khan NLUP conference hall-ah neih a ni a. Home Minister Pu R.Lalzirliana’n he meeting hi kaihruaiin Finance & Planning Minister Pu Lalsawta, Industries Minister Pu H.Rohluna, Horticulture Minister Pu Lalthanliana, NIB Chairman Pu J.H.Rothuama, NIB Vice Chairman Pu P.L.Thanga leh sorkar department hotu pawimawh te bakah Kolkota-a sumdawng Company hrang hrang aiawh te leh UN Agencies aiawh te an tel a ni.

Meeting kaihruaitu Home Ministe Pu Lalzirliana chuan Mizoram chu kawng hrang hrang atanga thlirin company liante tan sumdawnna tura hmun duhawm tak a ni tih a sawi a. A boruak a ralmuang a, rel kawng lian in a chhun thleng tawh a, power indaih lohna pawh tuna hydro project thawh mek te hian a tikiang mai dawn a ni, a ti a. Mizoram chhunga thil siamna leh sumdawnna lian kalpui tura company hrang hrang te nen indawrna chu lawmawm a tiin hei hian Mizoram tan hmasawnna a thlen a beisei tih a sawi.

Finance & Planning Minister Pu Lalsawta pawhin thu sawiin Mizoram chuan ram ruak a ngah a, ramngaw leh leilung hausakna pawh a nei tha. Hetih rual hian Mizoram sum leh pai dinhmun thlak dawrh tur chuan ram chhunga thil siam chhuah leh sumdawnna kalpui dan hi her danglam a ngai, a ti a. Sumdawng company hotute chu vawiin tlai hian a office a lengah sawmin chipchiar zawka sawihona neih zui puiah a sawm a ni.

Pu Partha S.Banerjee, Director, Deft Advisory and Research (ILO) chuan sum leh pai dinhmun chawikan nan Mizoram in chakna leh theihna a neih that zia chu ziaka tarlanna a tam tawh a. A takin sumdawnna bungrua leh service tha pe chhuak thei a ni tih a lantir a hun tawh a ni, a ti a. Pu Subrata Dutta, Senior Adviser, Deft & Research(ILO) pawhin Mizoram chu a ram ralmuanna avang leh inkalpawhna tha avangin India leh thenawm ram te insumdawn tawnna tura zuanchhan(springboard) duhawm tak a ni, tiin a sawi a. Rei rak zirchianna an lo neih tawh atangin Myanmar ram leh Bangladesh ten an bungraw mamawh Mizoram atanga siam chhuah emaw, thawn chhuah theih tur chi te a tarlang bawk a ni.

He meeting ah hian sumdawng company ten an thil siam chhuah leh sumdawnna an kalpui dan tlangpui te, Mizoram atanga thil siam tur item pawimawh leh thenawm rama thawn chhuah tur te, sum leh pai dinhmuna Mizoramin hlawkna a tel theih dan tur te, Mizoram industrial policy leh a kaihhnawih te, power leh thil danga Mizoramin harsatna leh tlakchham a neih te, ngaihthlak leh sawi ho a ni a. Company hotute hian naktukah thilsiamna hmun pawimawh te an tlawh ang a. Nilai zanah Chief Secretary hovin an programme tlangkawmna meeting an nei dawn a ni.