Kumin Chapchar Kut puala Information & Public Relations Department-in thlalak leh lemziak pholan a buatsaih chu vawiin chawhma khan Vanapa Hall, Aizawl-ah I&PR MInister Pu Zodintluanga’n a hawng.

Thlalak leh lemziak hrang hrang mipui hmuh theih tura pholan tunkar Inrinni thlega awh tur hawng hian Minister chuan khawvelin lemziak leh thlalak thiamte a ngaisang a, art chi hrang hrang hi eizawnna tling khawp a ni tawh a ni tiin Mizote pawhin kan hlut thiam deuh deuh a pawimawh a ni, a ti. Tunlai internet khawvelah phei chuan Mizo kutchhuak lemziak leh thlalak mit la tak tak phochhuah thinte hi mite ngaihven an hlawh tan hle a, sorkar pawhin ngai pawimawh zual a, tanlakpui dan a dap zel ang, a ti bawk.

Exhibition hawnna kaihruaitu I&PR Director Pu Jim K. Chozah, MIS chuan exhibition buatsaih dan tlangpui a sawi a. Tualchhung lemziak thiam mi 32 kutchhuak 80 lai leh thlalak thiam mi 15 te kutchhuak 54 mipui hmuhah pholan a ni thei chu lawmawm a ti a. Heng bakah hian I&PR Department thlalak neih sa 17 leh I&PR Director hlui Pu L.R. Sailo mimal ta 12 pawh pholan a ni. He Exhibition hlawhtlin nan lemziak pawl 3 - Mizo Academy of Fine Arts (MAFA), Mizo Artists’ Society (MAS) leh Mizoram Art Gallery (MAG) te thlawpna chungah lawmthu a sawi bawk a ni.