Nimin 27th February, 2012 chawhnu khan Mizoram Legislative Assembly Speaker Pu R. Romawia chuan West Bengal State atanga MLA rual Mizoram rawn tlawhtute Speaker Office Chamber-ah kawmin duhsakna thilpek a hlan. State tin-a Legislative Assembly-in Committee peng hrang hrang an nei thin ang hian West Bengal State Legislative Assembly chuan MLA Local Area Development Project Committee neiin, a hmingah “Bhidhayak Elaka Unnayan Prakalpa” an vuah a. He Committee-a an Chairman hovin member 12 leh Official 3 ten Mizoram an rawn tlawh a ni.

Speaker Pu Romawia chuan anmahni lo lawmna thu sawiin Mizoram Legislative Assembly dinhmun tlangpui te a hrilh a. Hetianga State hrang hrang Legislative Assembly-a Committee ten intlawhtawnna leh kalphung inzirtawnna an nei thin hian hlawkna tha a siam sak thin thu tarlangin he Committee pawh hian Mizoram an rawn tlawh chu an hlawkpui ngei a beisei thu a hrilh a. Mizoram-a an cham chhunga hlim taka awm tura duhsakna hlanin, Mizoram an rawn tlawh hriatreng nan ngaih hruaina thil a pe theuh a ni.
 
Speaker hi Pu John Rotluangliana, Deputy Speaker leh Pu Nirupam Chakma, M.L.A. bakah Pu Ngurthanzuala, Secretary, Mizoram Legislative Assembly leh Official dang ten an tawiawm a ni.