March ni 1, 2013 khan Saikuti Hall, Lunglei ah Chapchar Kut 2013 chu Mizoram hmundang te ang bawk in hman ve a ni a. He Kut ni ah hian malzai, zaipawl zai, cheraw lam, khuallam, chhaihlam, chai,sarlamkai,chawnglaizawn leh Tlanglam te bakah Kut nula hmeltha ber thlanna te nei in hlim taka hman a ni. Pu R.Romawia ,Speaker, Mizoram Legislative Assembly chu Kutpa niin Lunglei a Chapchar Kut hi a hman a ni.

Kutpa hian Mizo te khawvelah pakhatna kan nih theihna awmchhun chu kan hnam ro thil leh nundan chawikan a vawn that tlat hi a ni a ti a. Mizo hnam rilru pu, Mizo nationalism a chiang tan kan hnam dinchhuahna tur ngaihtuah leh kan pipute atanga kan hnam kalphung humhalh tluka pawimawh a awm loh thu a sawi.

Speaker Pu Romawia ,Kutpa ni bawk chuan Mizo te tana thil pawimawh hmasaber chu nun leh mizia chhungril taka siamthatna , Moral Reformation ani ati a. Kohhran ah petu leh YMA ah thawktu leh tlawmngai kan nih theih laiin sawrkarah chuan dawngtu nih chiah duh leh sawisel tur zawng kan ni mai awm e, atih theih a. Hei hi kan thlak chuan hma kan sawn nasa hle in a rinawm a ni ati bawk. YMA ,sawrkar leh pawl te kutah dah mai lovin mimal anga vantlang thil kan siamthat leh humhalh theih te hi kan ti hreh tur a ni lo a ti.

Kut hun hi Addl. DC Pu Lalfela Sailo, Organising Chairman ni bawk chuan a kaihruai a.Kumin Chapchar Kut hi hman tum na hmun Thuamluaia Mual chu Artificial turf phah a nih avangin a rem ta lo a ni.