Chief Minister Pu Lal Thanhawla chuan nimin tlai khan Mumbai-a Tata Memorial Centre bulah Mizoram House tur lungphum a phum.

Chief Minister chuan Mizoram House tur hi damlote tan leh thalai zirlaite tana ruahman anih thu sawiin, damlote ngaihpawimawh an nih avangin sorkar-in Mizoram House atan mimal in luah hawhin bul kan tan a, tunah a lung kan phum thei ta hi kan lawm hle a ni, a ti a. A sakna hmun tur ram hi a man thuah chuan Rs.200 Crore (cheng vaibelchhe 200) man a ni a, amaherawhchu kum 2000 chho laia Maharashtra Governor S.C. Jamira puihna leh a hmalakna avangin a thlawnin kan neih theih phah a ni a ti. A sak hna hi kum 2 chhunga zo tura ruahman a ni a ti.

Chief Minister chuan hmundanga Mizoram House sakna tur Chennai ah te, Bangalore ah leh Pune ah te ram dil mek a ni a ti a. Mizo thalai ten an mamawhna apiangah sum dinhmunin a zir chuan, Mizoram House kan sa zel ang tiin, khaweng kan hmuh ve a, hma kan sawn zel nana kan mamawh a ni a ti.

Chief Minister chuan kan mamawh tam zawkte nei thei turin kan thawhchhuah a tlem si a, chuvangin thawkchhuak tam turin hma kan la mek a ni a ti a. Bay of Bengal a chhuahka siam a, sundawnna kawng sial tum anih avangin chhimlamah airport hmun tur dap mek ani a ti a. Rel kawng pawh siam turin hma kan la dawn a ni a ti. Pu Hawla chuan ei leh barah kan intodelh a, mirethei leh pachhia ten eizawnna mumal an neihna turin NLUP hmangin hma kan la mek a, UNO hnuaia FAO hriatpui khawpin hna kan thawk mek a ni a ti. Leihnuai hausakna pawh kan hre zel a, natural gas phei chu hralh chhuah tham a awm a ni tih kan hre tawh a, oil pawh a dinhmun kan zirchiang mek a ni a ti. Chutiangin hmasawnna hna hrang hrang, kawngpui siam te, tui thianghlim in tur lakna te leh power lamah te nasa takin hma kan la a ni a ti.