Zoram hmun dangte ang bawkin vawiin nileng khan Serchip Field No. II ah Chapchar Kût lawm a ni a, Pu Joseph Lalhlimpuia, MLA, Vice Chairman Lunglei HPC chuan ‘Kût Pa’ niin a hmanpui a, Serchhip bawrhsap Pi Juhi Mukherjee, IAS chu ‘Kût Thlengtu’ niin Serchhip khawpui chhung leh khaw pawn atangin YMA branch hrag hrangte an tel tha hle a ni.

 ‘Kût Pa’ Pu Joseph Lalhlimpuia chuan Kristianna nena inrem taka Chapchar Kût kan hmang thiam chu thil lawmawm tak a nih thu a sawi a, Chapchar Kût hian pi leh pute atanga hnam ro hlu tlawmngaihna, rinawmna leh aia upa zah thiamna kan nunah tuh thar leh se a ti a, thliarkar rilru paiha kan mikhualte zo nun ze mawi zirtir thei tura tan lak a tul thu sawiin ram zimte kan neih chhunah hian zo hnahthlakte lungrual tak leh inngeih tlang taka kan khawsak ho dial dial hi kan hnam ropuina leh dinchhuahna tur a ni tih hria a, rilru thar pu chunga chapchar Kût hmang turin mipuite a fuih a ni.

Vawiin Chapchar Kût lawmna hi hun hnihah then a ni a, hun khatna hi Pu Kawlthuama Chapchar Kût Organising Chairman chuan a kaihruai a, Pi Juhi Mukherjee, Kût thlengtu nu chuan inlawmna thu sawiin Pu RL. Chhuanawma, President, Sub Hqrs. YMA in Kût Chibai bukna thu a sawi a ni.