Vawiin chawhma dar 11; 00 khan District Playground Saiha-ah “Chapchar Kut 2013” chu ropui taka lawm a ni.
He Chapchar Kut lawmna hi Pu B. Lalchhawnttuanga SDO (S), Saiha chuan a kaihruaia, District Bawrhsap Pu Alok Swamp chu Kut Pa a ni. Zing dar 11:00 ah Kut Pa chuan Kut puanzar pawt pharh in Chapchar Kut hawnna leh thuchah a sawi a, Kut Pa chuan India ram chu mi chi hrang hrang leh hnam hrang hrang te chen khawmna anih avangin hnamzia leh Culture hrang hrang neite kan ni a, kan hnam nunphung leh ziarang te inzah sak tawn a, mahni hnam nunzia te vawng nung zel theuh turin kalkhawm te chu a chah a, Mizo ten kan Lo neih dan hlui kum tina ramngaw te thiata lo kan neih thin dan bansan theih nan sawrkar chuan NLUP hmangin mirethei te chawikanna leh chhanchhuahna kawngah hma nasa takin a la mek a, he sawrkar hmalakna hi alo hlawhtlin theih nan theih tawp chhuaha tan la theuh turin mipuite chu a chah bawk a ni.
He Chapchar Kut lawmna ah hian hawnna hla MYA Hqrs New Saiha ten an sa a, Pu C. Sangmanga’n Hlado chhamin tlang a tlir bawk a ni. School naupang ten pawnto hmuhnawm tak an entira. Kan pi leh pu te hunlai atanga vawiin thlenga kan hnam - incheina chi hrang hrang (Costume Parade) hmuhnawm tak LWA, MUP leh MHIP ten an entira, Hnamlam chi hrang hrang heng YLA Saihatlangkawn, Joint YMA Saiha, MGYA Saiha, MHIP Sub-Hqrs, leh MUP Sub-Hqrs ten an entir bakah Pu C. Thahe leh a pawlten Darbu chikim an tum bawk.
He Kut lawmna ah hian zaithiam hrang hrang te zai ngaihthlak a ni a, Joint YMA te bultumin Chai Lam hmuhnawm tak entir a ni. Miss Chapchar Kut atan NI. TC Vanlalpari D/o TC Lalfakzuala New Saiha chu thlan a ni. He Chapchar Kut lawmna ah hian Artui hminsa hmangin Chhawnghnawhna neih a ni bawk. Joint YMA te bultum in a duh apiang tan Chai na hun a siam bawk a ni.
Pu Lalhmingliana Fanai in lawmman semna a neih hnu ah Pu Zothanmawia Khiangte SDC chuan lawmthu sawina nei in he Chapchar Kut lawmna hi tin tawp a ni.
