Vawiin khan Kolasib- ah Chapchar Kut ropui taka hman a ni a, Kut hi Pu S. Hiato, Tourism Minister chuan Kut Pa niin a hmanpui.

Kolasib Diakkawn Field-a Kut hmanna-ah hian Pu S. Hiato chuan thu sawiin Mizote Kut pui ber Chapchar Kut chu mitin ten inremna leh intluktlanna thinlung nena hlim taka kan hman thin a niin hei hi thangthar zelten kan chawisan zel a ngai a ni, a ti a. Pi pu nun laia kan hman dan chu nun lo inner chho zelah kan Kristianna nena kalrem turin her rem zel a nita a. Chapchar Kut kan hman thin hi kan hnam zia leh ro tuai tharna hun tha tak a ni a, thangthar zelte tana inzirna tha tak a ni, a ti a ni.

Pu S. Hiato chuan Mizote nunzia, zai leh lam tehi zinmi, tourist ten an hmu chak hle thin a. Tourism Department in September thla-a Anthurium Festival Reiek-a an buatsaih thin ah te leh vawiin ni Chapchar kut angah te hian Aizawl-ah chuan khualzin min rawn tlawhtu an tam thin hle a ni, a ti a. Kan hnam lam leh zai te hi khawvel hriata Mizote min pho chhuaktu an niin Cheraw-a World record kan han siam te kha khawvelin min hmelhriatna a ni, a ti. Hlim takin Kut ila, kan hnam zia hi i vawng nung zel ang u, Pu Hiato chuan a ti a ni.

Pu HT Rila, Pre, YMA, Sub Hqrs Kolasib kaihhruai Kut hmanna ah hian Kolasib mi pali te hnenah chawimawina hlan a ni a. Chungte chu Pu F. Zatawna, Tumpui, mi tlawmngai, khawtlang tana mahni in theihnghilha thawk thin te, Tv. K. Zorammuana, Tumpui, MCS tun hnaia tling ta te, Dr. Lalthazuala Rokhum, New Diakkawn, zirna lama mi tumruh , Pu Pu Lalrinmawia Ngente, Diakkawn, Zirtirtu thawh that vanga state award lo dawng tawh tu te an ni.

Kolasib DC Pi Niharika Rai, IAS chuan lawmthu sawiin kut hmangtute hnena thuchah a sawi bawk a. Zai leh lam chi hrang hrang te entirin nilengin hlim taka Kut hi hman a ni a. Tlaiah MHIP, Kolasib Sub Hqrs huaihawtin chhawng hnawh a ni bawk a ni.

Pu S. Hiato hi Pu Vabeiha Hlychho, Director Tourism chuan a tawiawm a ni.