Mizoram Sawrkar Art & Culture Department in District Headquarters tina Chapchar Kut 2013 hmang theuh tura a hriattir angin, Champhai District chuan tukin zing dar 10:30 khan Kahrawt Field ah urhsun takin Chapchar Kut a hmang a. He hunah Man Pu Lalrinliana Sailo, Minister Health & Family Welfare, etc chu Kut Pa a ni.
Kut Pa Pu Lalrinliana Sailo chuan thu sawiin Chapchar Kut chu Hlimna Ni a ni a, upate chuan Chapchar Kut Ni chuan Nupa pawh inhauh loh tur, thenawm khawveng te nen inremna Ni a ni a, Kut sa te, an neih ang ang te an in pe tawn thin a. Pipute atangin Kut Ni Vangthla chu hah tak hna an thawh zawh hnu a an chawlh hahdamna hun a ni a, inremna, induhsakna, Inhmangaihna, innghirnghona bona Ni a ni tiin vawiin ni pawh hi hlim taka hmang turin Kut hmangtute chu a sawm a. Kan ram hi thil chi hrang hrangah han lang ve thin mahila, khawvel huapa mizote min phochhuak tu chu Chapchar Kut hi a ni a, he Kut kan hman lai hian ramdang atangin khualzin an lo kal thin a, khualzin an tarn phah a, chu chu kan ram economy tan pawh a that phah dawn a ni, a ti. Champhai District khawpuia hetiang hunpui hlawhtling taka hmang thei tura buaipuitute hnenah lawmthu sawiin, a bik taka upa lam ten an tuipui chu lawmawm a tih thu a sawi bawk a. Kut Pa hian a thusawi lai hian Kut ni induhsak tawnna entir nan Dawnfawh a phel a, a chaw fun a thet bawk a, chu chu a sem a ni.
Chapchar Kut thlengtu Pu Zoengsanga, Addl. D.C chuan Kut buatsaih turin committee in uluk takin a hman dan tur an ngaihtuah a, Sub-Hqrs YMA Champhai kutah a awm ta a ni tiin Kut hmang tura lo kal mipuite hnenah lawmthu a sawi a ni.
Chapchar Kut Champhai a hmannah hian Pu P.C Zohlira, President Sub-Hqrs YMA, Champhai chuan welcome speech- Kut hman dan chungchang sawi hawnna a nei a. Programme ah hian items hrang hrang hmuhnawm tak tak entir a ni. Sub-Hqrs YMA zaipawl in Kut hawnna hla an sak hnuin MUP Sub-Hqrs, Champhai-in Hlado chham leh Tlangtlir an entir a, Cheraw-Buh Za Aih leh Kan Tluang Branch YMA 12 in an entir a. YMA chhangin Zoram Khuallam entir in, Branch YMA 6 infin khawmin Sarlamkai an entir a, MHIP Branch 12 ten Par Lam an entir bawk. Heng bakah hian zaitbiam zai ngaihnawm tak tak ngaihthlak a ni a, Chai leh Mizawn Inchuh te YMA Branch hrang hrang in an entir bawk.
Branch YMA zinga thisen pe hnem ber Champhai Vengthlang Branch chu Pu T.T. Zothansanga, MLA, Champhai North in Citation a hlan bawk a. Kut hmangtu mipuite hi eitur tui tak tak a hrai an ni a, tlai lamah pui taka Chhawng hnawh a ni.
Kut Pa Pu Lalrinliana Sailo hian tukin zing khan Champhai District Hospital sak mek a tlawh a, tlai lamah hian Venglai Community Hall ah Champhai District Promoters Club ten Music Video Album an buatsaih chu a release dawn a ni.
