Chapchar Kut lawmna ni hnihna chu vawiin chawhma dar 11:00 khan Lammual ah hman chhunzawm a ni a, Kut Pa Pu P.C.Zoram Sangliana, Art & Culture Minister chuan Kut Thuchah sawiin Kut hmangtu zawng zawngte chu midangte tana malsawmna ni tura inhlan thar theuh turin a sawm. Pi Pu te tihdan chhunzawma tlawmngaihna leh rinawmna leh huaisenna vawng nung zel tura ngenin midangte duhsak chu Chapchar Kut rualin lo vul thar zel se a ti. Kristianna leh Mizo hnamzia chu a inhmeh a ni tiin Chanchin Tha leh Chapchar Kut pawh inrem taka lawm theih a ni, a ti. Kut chu Mizo hnam hrang hrang min phuarkhawmtu ah i hmang ang u tiin World Record siam thei khawpa Cheraw kantu te zawng zawng chungah lawmthu a sawi bawk.

Vawiin Chapchar Kut lawmna ah hian Pu R.Lalvena, IAS, Secretary, Art & Culture Dept. chu Kut Thlengtu a ni a, Chapchar Kut chu inrem nan hmang theuh turin mipui kalkhawmte chu a sawm a, CYMA President Pu T.Sangkunga pawhin Kut hmangtu te zawng zawng hnenah duhsakna a hlan bawk.

Vawiin Chapchar Kut lawmna ah hian hnam lam, rimawi leh zai mawi tak tak te entir a ni a, Kut hmangtu mipui kalkhawm pawh an thahnem hle a ni. Vawiin programme hi Deputy Speaker Pu John Rotluangliana leh Parliamentary Secretary Pu Lalrinmawia Ralte te bakah MLA engemaw zat ten an hmanpui bawk a ni.