Chapchar Kut 2013, a ni khatna chu vawiin chawhma dar 11.00 atang khan AR Ground, Aizawl-ah ropui taka hman tan a ni a. He Kut hian hlut a hlawh hle a; chanvo nei turte mai bakah Kut chhim turin lammual khatin mipui an fuankhawm a ni.
Vawiina Kut Pa, Home Minister Pu R. Lalzirliana chuan thuchah sawiin, “Tunhmaa kan pi-puten Zu bel nena an lo urlawk thin Chapchar Kut hlimawm tak chu Pathian thlarau thianghlim uapna hnuaiah kan hmang ta zawk hi a lawmawm a. Mizo culture leh Kristianna hi pi-pute hun atangin a lo inhnaih hle a; kan hnam ziaranga bet tlat – tlawmngaihna te, inhmangaih tawnna te, induhsakna te, mi dangte tana malsawmna nunte chu Mizo hnam ze pawimawh tak a nih ang chiahin, Kristian nun dan tur reng pawh a lo ni” a ti. Pu R. Lalzirliana chuan, “Kan hnam lam chi hrang hrangte hi kan culture parchhuahna a ni a, kan culture innghahna bul leh ril zawk erawh chu kan hnam nunze hlute hi a ni a. Chuvangin, Chapchar Kut hmangtute hian kan hnam nunze hlute hi hunin a liampui lohna turin i chawinung sauh sauh ang u” tiin mipuite a chah a. Kan rama remna leh muanna a awm zel theihna tura a chhunga chengte zawng zawngin theihtawp kan chhuah a, inngeih dial diala kana wm hi a pawimawh a ni Home Minister chuan a ti bawk.
Chapchar Kut 2013, ni khatnaah hian Cheraw te, Chawnglaizawn te bakah item chi hrang hrang mit la tak takte entir a ni a. Mimal leh group ten zai leh rimawiin Kut hmangtute an awi reng bawk a ni. Chapchar Kut pual hian AR ground-ah a duh apiangte tana intihsiakna chi hrang hrang buatsaih a ni a; Flower show te, handicraft exhibition te, thlalak leh lemziak entirna te Vanapa Hall-ah leh Assembly Annexe hnuaiah te buatsaih a ni bawk.
Vawiina Chapchar Kut hmannah hian Pu Ngurbiaka, Art & Culture Director chu Kut Thlengtu a ni . Naktuk chawhma dar11.00 hian AR Ground-ah vek hian Chapchar Kut ni hnihna hi hman tur a ni a; hetah hian Khuallian chu Pi Ranee Nara, Union MoS for Tribal Affairs a ni ang a; Pu P.C. Zoram sangliana, Art & Culture Minister chu Kut Pa ni ang a; Pu R. Lalvena, Secretary, Art & Culture chu Kut Thlengtu a ni ang. Chapchar Kut hmanna hi Doordarshan, Aizawl chuan LIVE-in a pe chhuak reng a ni.
