Vawiin chawhma dar 10:00 khan Champhai I & PR Conference Hall, CHANEM building ah Pu C.Lalniliana, Director of Agriculture ( R & E) kaihhruaiin Krishi Vigyan Kendra (KVK) Khawzawl, Champhai District huaihawtin Scientific Advisory Committee (SAC) neih a ni. Pu C.Lalniliana, Committee kaihruaitu chuan KVK kalphung leh tobulte sawifiahin India rama KVK thanlen chhoh dan leh hetiang KVK hi 1000 dawn a tlin tawh thu a sawi a, Mizoramah pawh kum 2003 vel atanga bul tanin kum 2008 ah phei chuan District tinah a din kim vek thu a sawi a,Kut hnathawktu hrang hrang, Loneitu, huanthlai siam tute leh an hlawkpui tur atana enchhinna hrang hrang a an lo hlawhtlin dan te a sawifiah a, heng huan thlai enkawlpui tura KVK hnuaia Subject Matters Specialist ten hneh taka an enkawl chhoh dan te lawmawm a tih thu sawiin, an hmalak zel dan turte a sawi bawk a ni.

Scientist te hmalakna leh report an pekte chu uluk taka ngaithla tura kalkhawmte chu sawmin Pu Lalniliana chuan enge Mizoram tan tha ang a, enge tha lovang tih chu sawiho tur a ni a, heng scientist te hnathawh hi a takin a lang tawh a, Zoram hi loneihna leh huan thlai enkawlna kawngah an hlawhtlin pui hle tawhna ah lawmthu a sawi a, kan Scientist te hi an awm mai mai lova, an thawh rah chu a takin a lo lang tawh a ni a ti.

Pi Lalrinawmi Renthlei, Programme Co-ornidator chuan power point presentation hmangin report a pe a, KVK (Farm Science Centre) in Khawzawla an hnathawh hrang hrangte leh an hmun hmate entirin KVK chu a zirtirna mai ni lovin,a tih a tih leh a thawh a thawh "Teaching by doing & Learing by doing" a ni tih a sawi.Huan thlai leh thei serthlum, Sawhthing, etc lama harsatna tam tak Loneitute an sutkian pui tawh dan leh harsatna neite pawhin hetiang lama mithiam te rawn fo a tha tih hre turin kut hnathawktute a sawm bawk.

KVK Khawzawl Office thang duang takah hian thawktu Officer leh staff 16 awm mekin, KVK in a kaihhnawih department hrang hrang- Agriculure, Horticulture, AH & Vety, Fisheries, Soil etc., te nen tha taka an inthlunkhawm dante Pi Rinawmi chuan a sawi bawk.

Kum 2012-2013 hmalakna leh kum 2013-2014 hmachhawp te hetiang hian pek a ni bawk:-

 a) Agronomy            - Pi Lalramengi SMS (Agro)

b) Horticuture           - Pi Malsawmkimi SMS (Horti)

 c) Plant Protection   - Pi F.Zoramthari SMS (PP)

d) Agri.Extension      - Pi J.Vanlalhluzuali SMS (Agril.Extn)

e) Soil Science          - Pi Lalrinawmi Renthlei PC, KVK

 f) Animal Science     - Pi Lalrinawmi Renthlei PC, KVK

KVK in Committee a buatsaih ah hian Department aiawh te, Kut hnathawktute leh Loneitu te an kal tha hle a, Zawhna leh chhanna hun tha tak hmangin, Committee tawpah Pi Malsawmkimi SMS (Horti) in lawmthu sawiin Committee hi an titawp a ni.