Vawiin February ni 28 hi India ram tan ni pawimawh National Science day a ni a, ram pumah Science & Technology hmalaknain thupui thlan bik hmanga lawmna hun uar tak a hman a ni. Kumin thupui chu ‘Science hmanga hlawk zawka thlai thar leh ei leh bara himna’ (Genetically Modified Crops & Food Security) tih a ni. Mizoram-ah pawh Mizoram Council of Science, Technology & Environment hmalaknain Aizawl-ah Pachhunga University College leh Govt. Zirtiri Residential Science College-ah leh Serchhip-ah Govt. Serchhip College-ah a puala hun hman a ni a, Lunglei-ah MZP Headquarter Lunglei huaihawtin hun hman a ni bawk.

 National Science day hi kumtin February ni 28 ah hman thin a ni a, India ram mai ni lo Asia khawmualpui atanga Science Nobel Prize dawng hmasa ber Sir. C.V. Raman-an kum 1928 February ni 28a Raman effect a hmuhchhuah hriatrengna ni a ni. Kum 1986 khan India ram ni pawimawhah sawrkarin a puanga, 1987 atang khan kumtin lawm thin a ni ta a ni. He ni hi Science thiamna kawng hrang hrangin ram hmasawnna a thlen nasat dan inhrilh hriatna atan hman thin a ni.