Vawiin khan DC’s Conference Room, Saiha-ah kumin 2014 March ni 7-a Chapchar Kut lawm dan tur ngaihtuah a ni.

He meeting hi Pu Alok Swarup IAS, District Bawrhsap Saiha chuan a kaihruai a, kum danga lo tih thin angin District Playground, Saiha-ah Chapchar Kut lawmna programme hi hman tum a ni a, “Kut Pa” atan Pu RT Zachono, CEM, MADC chu beisei niin, “Kut Thlengtu” atan District Bawrhsap Pu Alok Swarup chu ruat a ni bawk. Kut hawnna hla MYA New Saiha ten an sa anga, Kut hawnna leh thusawi Kut Pa hnen atanga ngaihthlak anih hnu ah Pu C. Thahe in Hlado a chham dawn a ni. He Kut lawmnaah hian Saiha khawpui chhunga School hrang hrang naupang ten Pawnto an entir anga, Hnam Inchei entir turin LWA, MCHP, MUP leh MHIP te ruat an ni. Darbu Tum Pu C. Thahe leh a pawl ten an entir bakah Mr. leh Miss Chapchar Kut thlanna neih a ni bawk ang. Kut lawm ni hian Mal zai zaithiamte hnen atanga ngaihthlak a ni anga, Chheihlam, Chhawnghnawh leh Chai Lam te entir a ni ang, Chapchar Kut lawmna a tel turin mi zawng zawng sawm an ni.