Ni 14.3.2015 (Inrinni) khan Mizote Kut ropui ber Chapchar Kut 2015 chu Mangkhawngdai Field Mamit-ah ropui taka hman a ni a, Kut thlengtu Pu Vanlalngaihsaka District Bawrhsap niin Kut Pa chu Pu K. Lalhmingliana Project Director DRDA a ni.

Chapchar Kut hmanna ah hian Kut thlengtu District Bawrhsap Pu Vanlalngaihsaka chuan Chapchar Kut 2015 chu remchanna zawkna avangin Zoram chhung hmun dangte ruala hmang lovin ni 14.3.2015 a hman a nih thu a sawi a, Mizoten a kan kut ropui ber leh ngaihhlut ber Chapchar Kut chu hlim taka hmang theuh turin Kut hmangtu zawng zawngte duhsakna chibai a buk a ni.

Kut Pa Pu K.Lalhmingliana pawhin Kut hawnna neia thusawiin kan kutpui hmanna ah hian Mizo kan nihna dik tak lantir in kan pi leh pute hlimna Ni-ah hian hun hlimawm tak hmang turin leh zonunmawi chhawm nunga tanpui ngaite tanpui kawngah te, rinawmna, dikna, huaisenna, tlawmngaihna te leh taimakna chhawm nung zel turin Kut hmangtu zawng zawngte a sawm bawk a ni.

Chapchar Kut hmanna ah hian Mamit Cultural Organization atangte leh Mamit khawpui chhunga Branch hrang hrang YMA leh MHIP te atangin Mizo hnam lam chi hrang hrang entir a ni a, Aizawl leh Mamit District chhung atangin zaithiam tak tak zai ngaihthlak a ni bawk.