Serchhip District Consumer Association huaihawtin tukin (Inrinni) dar 7:00 khan Serchhip Bazarah “World Consumer Rights Day” pualin hun hman a ni a, he hunah hian Pu Andrew H. Lalremruata, MIS, DIPRO Serchhip chu khuallian a ni.

World Consumer Rights Day hi March 15 Pathianni a ni a, remchan zawkna avangin Inrinni ah hian hemi puala hun hi hman a ni a, Kumin World Consumer Rights Day thupui atan 'Healthy Diets' tih chu thlan a ni. He hun hmanna ah hian khuallian Pu Andrew H. Lalremruata chuan thu sawiin Consumer te pawimawhna a tarlang a, Mizo te hi ei leh in lamah hian kan duhtui lo thin hle a, hei vang hian natna tam tak pawh kan tawrh phah a ni tiin ei leh in lama fimkhur leh duhtui a tul zia a tarlang bawk. Consumer Association te chu mipui te tana ding leh mipuite hamthatna leh dikna tarlansaktu an nih avangin an pawimawh hle a ni a ti a, mipui te chu Consumer Association te chhawr tangkai a, sumdawng tena diklo taka thil an leitirna tur lakah inveng theuh turin a chah a, thil lei leh hralh chungchangah thil diklo leh sawisel tur an nei anih chuan  Consumer hruaitute hnena complaint thehlut thin turin a chah bawk.

Pu H. Zonuntluanga, President SDCA pawhin thu sawiin Consumer te chu sawrkarin a chhan tlat a, chuvang chuan thil diklo chu huaisen taka do let turin a fuih a, mipui ten harsatna an tawk anih chuan anmahni tanpui turin an inpeih reng tih a sawi bawk. Pu H. Zonuntluanga chuan thilzuartute chu an buklung hman te dik taka khai turin a ngen a, an bukna te a dik ngei em tih Legal Metrology lama enfiah tir thin turin a chah bawk.

Serchhip District Consumer Association te hian Serchhip District chhunga khaw hrang hrangah Awareness Campaign te neiin mipui ten an chanvo dik tak an chan theih nan theihtawpin hma an la mek a ni.