Vawiin khan Mizoram Art Development Society (MADS) leh Mizoram sawrkar hnuaia Department pahnih, Art & Culture Department leh Information & Public Relations Department-te tangkawpin, Chapchar Kut 2016 lawmna atana an buatsaih, ‘Art Exhibition’ chu Vanapa Hall Varanda chungah Information & Public Relation Department Director Pu Jim K. Chozah chuan mipuite en theih turin a hawng a. He Art Exhibition hi March ni 4 thleng hawn a ni ang.

Hawnna inkhawmah hian Khuallian Pu Jim K. Chozah chuan art pawimawhna sawiin, “Ram hmasawnna tak tak chu sum leh pai thawh chhuah tam lamah chauh a innghat lova, mipuiten rilru zalen tak pu chunga an ngaihdante art hmanga an pholan theihna hi hmasawnna nghahchhan pawimawh ber pakhat a ni,” a ti a. MADS member-ten hloh pawh huama Mizo hnam ziarang tarlanna kut lian ber, Chapchar Kut 2016 hlawhtlin theih nana an inpekna chu ropui a tih thu leh Mizo kutchhuak lemziakte chu khawvel huap pawha chhuanawm tham an nih thu Khuallian chuan a sawi bawk. I&PR chu Mizoram sawrkarin Nodal Department atan a ruat tih sawiin khuallian chuan Art lama tui mite chu thawhhopuiah a sawm a, thawhhona tha tak a awm chuan khawvel hriatah Mizote thiamna hi pho chhuah a la ni ang, a ti bawk. Khuallian chuan thu a sawi zawhah ribbon chep chat in Art Exhibition hi mipuite tlawh theih turin a hawng a ni.

Art Exhibition hawnna inkhawm tawi hi MADS President, Pu Laltanpuia’n a kaihruai a. MADS General Secretary Pu Vanlalhriata chuan Exhibition buatsaih a nih dan leh exhibition kalpui dan tur report a pe bawk. He Exhibition-ah hian MADS member mi 20-te lemziak mawi tak tak bakah member pakhat kutchhuak, lem-tuk (thing-kermawi) engemawzat phochhuah a ni a. Lemziak leh thiamthil phochhuahte hi Mizo hnam ziarang leh Mizoram hmunhma mawina pholang theite bakah ngaihruatna ril tak puanchhuahnate an ni a.

Hawnna inkhawmah hian MADS member-te bakah I&PR Department Officer thahnem tak an tel a.

Mizoram Art Development Society-ah hian member 64 an awm mek a ni.