Vawiin chawhma dar 9:30 khan Chhiahtlang BNRGSK Hall-ah Rajya Sabha MP Pu Ronald Sapa Tlau-in Sansad Aadarsh Gram Yojana hnuaia Model Village a siam tura a thlan Chhiahtlang khua a he scheme hnuaia hmalakna peng pakhat Corporate Social Responsibility kaltlanga General Insurance Company, Mumbai in "Sustainability Livelihood for Small & Marginal Farmers Project" hnuaia tanpuina a ruahman dawngtute hnenah tanpuina tangka sem a ni a, he hun hi District Bawrhsap Dr. Lalrozama, IAS chuan a hmanpui a ni.

District Bawrhsap chuan tanpuina dawngtute leh a hriatpuitu mipui kalkhawm hma ah thu sawiin Chhiahtlang khaw mipuite vanneihna a lawmpui rualin a khaw mipuite pawhin an vanneihna hre thar fo tura a duh thu a sawi a, Sawrkar hmalakna piah lamah hetiang khawpa tanpuina dawng thei khua hi Chhiahtlang leh Khawlailung bak Mizoramah an la awm lo ni a a hriat thu sawiin mimal anga tanpuina leh khawtlang huap tanpuina he project kaltlang hian an dawng dawn a, Village Council te leh Sawrkar hotute thu zawm a tha taka chhawr tangkai ngei turin mipuite a ngen a, amah ngei pawhin an hmalakna hrang hrang te a hmunah hrilhlawk lova a tlawh thut thut thin tur thu leh hmasawnna dik a hmuh ngei a beisei dawn thu a sawi bawk a ni.

Bawrhsap chuan tanpuina dawngtu te chu taima taka hlawhtling ngei tura tan la tura fuihin an tih that tawk loh a tanpuina sum petu Company lam an lungawiloh chuan an duh hun hunah tanpuina an ti tawp mai dawn ani tih hre reng turin a chah a, amah ngei pawhin he project kalphung hi a hriatchian em avangin thahnem a ngaihpui takzet ani tih a sawi a, an khawtlang tana thil tha lo kal tur hi a tlawlh a phal dawn lo tih a sawi bakah khawtlang mipuite thawhhona a tha tih a hriat avanga lawmthu hrilh pahin lungrual tak leh khawtlang hruaitute zai ngai taka kal zel tura duhsakna a hlan bawk a ni.

Inkhawm kaihruaitu, DRDA Project Officer Pi Teresy Vanlalhruaii pawhin Corporate Social Responsibility kaltlanga tanpuina an hmuh theih dan leh a kalphung te sawifiahin theihtawp chhuah a Sawrkar leh mipui tangrual te ke pen tlanna in rah tha a chhuah tan mek a ni a ti a, CSR hnuaia kuthnathawktu mirethei ten eizawnna ngelnghet zawk an neih theih nan a ruahmanna siam chu a tihlawhchham tu nih tum lo turin beneficiary te a chah a, beneficiary te pawh uluk taka thlanchhuah an nih thu leh Village Council te leh PMRDF (Prime Minister's Rural Development Fellow) ten beneficiary tur a thlanchhuah te pawh an chenna in ngei a kal a an dinhmun an zirchian hnu a hlawhtling ngei tura thawk thei tur ni a an hriat an thlanchhuah te an ni tih sawiin za ah za (100%) hlawhtlinna an hmuh ngei an beisei thu a sawi bawk a ni.

Chhiahtlang Village Council President Pu C.R.Dothanga pawhin District Bawrhsap, DRDA Project Director leh a thawhpuite thahnemngaihna leh remhriatna avanga an beisei phak bak khawtlang hmasawnna tura ruahmanna an dawng chu lawmthu sawiin khawtlang pawhin theihtawp chhuah a a tha thei ang bera thawh an tum thu a sawi a, tanpuina sum dawngtute pawh an khawtlang hmel tilangtu tur an nih avangin Village Council hotute pawhin uluk taka an vil tur thu leh an harsatna tawh leh tanpui an ngaihna ah pawh an thlahthlam dawn loh thu a sawi a ni.

India Sawrkarin Company lian ten kumtin an hlawkna hmuh atanga 2% vantlang tana thil tha tihna atana hmang tura ruahmanna a siam "Corporate Social Responsibility" scheme kaltlangin Mumbai a hmunpui nei General Insurance Company chuan Chhiahtlang leh Khawlailung (Lok Sabha MP Pu CL Ruala'n model village a siam tura a thlan) tan Rs nuai 25 ve ve khawtlang hmasawnna turin sum a ruahman a, he scheme hnuaiah hian project hrang hrang awmin heng zinga pakhat "Sustainability Livelihood for Small & Marginal Farmers Project" hnuaiah vawiina tanpuina sum hi sem a ni a, General Insurance Company in sum hmahruai Rs nuai 12.5 Chhiahtlang tana a pek atangin he project hnuaiah hian Rs nuai 6 dah a ni a, beneficiary 10 awmin an ni hian hmalakna tura an duh trade hrang hrang an thlang a, beneficiary tin te hian Rs 60,000/- theuh an dawng dawn a, an dawn tur atanga a hmasa ber 1st instalment chu vawiin hian sem niin District Bawrhsap in beneficiary te hnenah a hlan a, tanpuina dawngtu beneficiary te chu :

1) Lalhmangaihzuala (Mobile Repairing) Rs. 30,000/-

2) Saikungi (WRC) Rs. 30,000/-

3) H.Lalmuanpuii (Poultry Farming) Rs. 20,000/-

4) Challianngura (Carpentry) Rs. 30,000/-

5) Zanghinglovi (Petty Trade) Rs. 10,000/-

6) Darziki (Poultry Farming) Rs. 10,000/-

7) Ramnghaksanga (Piggery) Rs. 15,000/-

8) Sangzuali (Piggery) Rs. 15,000/-

9) Lalhunpuii (Piggery) Rs. 15,000/-

10) Lalthlamuana (Grocery) Rs. 20,000/-

Vawiina tanpuina sum sem zawng zawng hi a vaiin Rs 1,95,000/- a ni a, beneficiary te hmalak tumdan leh an hmunhma neih dan azirin first instalment sum pek an nih dan a in ang lova, an sum hmuh atanga an hmalak tur chin ruahman sak te an thawh zawh huna endik anih hnu ah second instalment hi pekchhuah leh a ni ang a, beneficiary te hian a vaiin Rs. 60,000/- theuh an dawng dawn a ni.