Vawiin khan Mizoram Art Development Society (MADS) leh Mizoram sawrkar hnuaia Department pahnih, Art & Culture Department leh Information & Public Relations Department-te tangkawpin Chapchar Kut 2017 lawmna atana an buatsaih, ‘Art Exhibition’ chu Aizawl Art Gallery-ah Information & Public Relation Department Director Pi Lalnithangi, MIS chuan mipuite en theih turin a hawnga. He Art Exhibition hian vawiin atanga March ni 4 (Inrinni) thleng a awh ang. 

Exhibition hawnna inkhawmah hian Khuallian chuan art lama mi tui leh phur te intelkhawm a hma an lak avangin Mizoramah hemi kawnga hmasawnna hmuh tur a awm ta zel chu lawmawm a tih thu sawiin, Mizo artist-te kutchhuak mawi tak tak te hi ramdang atanga khualzin mite hiptu lian tak a la nih theih a beisei thu a sawi bawk a. Ram hmasawnna innghahna pawimawh tak pakhat chu a chhunga cheng mihringte thiamna leh ngaihtuahna tihhmasawnna a nih thu tarlangin, Art hi chumi atan a kawng pawimawh tak pakhat a ni, I&PR Director chuan a ti a. I&PR chu MADS tan nodal department a nih angin Mizo artist-te tihhmasawn leh zau zawka an kutchhuak te pholan a nih theih nan department chuan theih tawpa hma a lak thu tarlangin, thawhhona tha tak an neih thin avangin lawmthu a sawi bawk a ni. 

Art Exhibition hawnna inkhawm tawi hi MADS President, Pu Laltanpuia’n a kaihruai a. MADS General Secretary Pu Vanlalhriata chuan Exhibition buatsaih a nih dan leh exhibition kalpui dan tur report a pe bawk. He Exhibition-ah hian MADS member zinga mi 28 ten an kutchhuak 62 (lemziak 58 leh lemtuk 4) an phochhuak a. Kum 2012-a MADS indin atangin kumin hi Chapchar Kut puala Art Exhibition vawi li (4) buatsaihna a ni.