Vawiin khan Transport Building, Treasury Square-ah Mizoram Florist Asso­ciation chuan Chapchar Kut Flower Show & Fair an nei a, Pi Vanlalawmpuii, MLA, Mizoram State Women Commission Chairperson chu khuallian a ni. 

Khuallian Pi Vanlalawmpuii chuan, Mihring nun tihlimtu pangpar mi taima ten eizawnna tlaka an hmang thei ta chu hmasawnna lawmawm tak anih thu leh pangpar chingtute chu midang tana entawn tlak ni zel se, mipa tan pawh pangpar enkawl leh chin chu thil zahthlak a ni lova, theihtawp chhuaha chingtute chuan Mizoram mai ni lo, ram pawn lam thlengin an thawn chhuak tawh a, eizawnna tha tak neiin sum tarn tak an thawkchhuak thei tawh a ni, a ti. 

Khuallian chuan, pangpar chingtute chu tunlai hmasawnna Technology hmasawnna hmang tangkai a, miten engtin nge pangpar chin leh hralhchhuah kawngah hma an lak tih zirchiang chungin, midangte tan pawha kawng kawh hmuh thei khawpa tan la zel tura fuihin, pangpar zuartuten show room mumal tak neih thuai a nih theih nan hmalak a tum thu a sawi bawk. 

Mizoram Florist Association hian kum 1999 atang khan mumal takin pangpar chingtute leh zuartute tan hma an la tan tawh a, a tirah pangpar zawrhchhuahna (flower show & fair) hun kum khatah vawi khat te an neih theih laiin tunah chuan kum khatah vawi thum te an nei thei tawh a ni. Kumin chapchar kut pual hian hmun dang atanga pangpar chawk luhte zuar lovin, mahni pangpar tharchhuah leh house plant chi hrang hrang phochhuah a ni a, hei hian phai lama pangpar leina atana sum tarn tak luang chhuak tur ven nan leh pangpar chingtuten hlawk zawka an thar chhuah te an hralh theihna tura ruahman a nih vang a ni. 

Mizoram Florist Association-ten flower show leh fair an neih te hi Horticul­ture Department-in an sponsor thin a, kumin Chapchar Kut Flower Show pawh hi Horticulture Department sponsor a ni. Chapchar Kut flower show & Fair-ah hian dawr 45 hawn a ni a, ni 3 thum chhung zing dar 9 atanga tlai dar 5 thleng Mizoram chhunga pangpar chingtute pangpar tharchhuah leh House plant chi hrang hrang phochhuah a ni ang a, Pangpar chi hrang hrang bakah pangpar chawmna lei-tha pawh man tlawm zawkin lei nghal theih a ni bawk. 

Chapchar Kut Flower show & fair hawn inkhawm hi Mizoram Florist Asso­ciation (MFA), President Pi Lalnuntluangin a kaihruai a, Pi Liansangpuii, MFA Gen­eral Secretary-in Pangpar chingtu leh zuartute tana MFA hmalakna report a pe a, C YMA General Secretary Pu Lalhmachhuana, Chapchar Kut Organising Secretary pawhin thu a sawi bawk.