Vawiin khan Chapchar Kut Organising Committee chuan an Chairman, Chief Minister Pu Lal Thanhawla hovin kumin a Chapchar Kut hman dan tur CM Conference Hall-ah an rel.

Chief Minister chuan Chapchar Kut chu Mizo kutpui a nih angin hemi ni a mawhphurhna chelhtute chuan an tih tur theuhvah Mizo tlawmngaihna rilru pu chunga thahnemngai takin thawk se, tiin khualzin tam zawk hip thei turin leh mipui mimir huapzo thei ang bera Kut hman a nih theih nan ngaihtuahna uluk taka sen tha a tih thu a sawi a ni.

He thutkhawmah hian chanvo leh mawhphurhna semzai a ni a, hun hman dan tur kimchang duang turin Programme Sub-committee chu Art and Culture Director Chairman-na hnuaiah din a ni a. Kumin Chapchar Kut hi ni hnih (1st leh 2nd March) chhung awh tura ruahman niin, a ni hmasa zawkah hian Mizo infiamna lam hawi zawnga programme siam a, a ni hnihna ah zai, rimawi leh hnam lam chi hrang hrang a tam thei ang ber telh ni se tia rel a ni. Kut chhung hian mipui zingah Mizo hnam ziarang pho lang tam thei tur zawngin hnam thuam inbel uar tura inhrilh ni se tia rel a ni a.  A remchan dan angin kut chhim tur leh a lawmnaa tel ve turin Zohnahthlak state dang leh ram pawn a chengte chu sawm ni se tia rel a ni bawk.

Kumin Chapchar Kut hi Aizawl Sipai Lammualah hman leh tura ruahman a ni a. Kut Pa atan Myanmar Chin State Chief Minister Pu Salai Lian Luai chu sawm tum a ni a, Chapchar Kut Organising Committee Chairman, Chief Minister Pu Lal Thanhawla chu Kut Thlengtu tura ruat a ni. Kut pual hian painting and photo exhibition leh flower show-cum-exhibition bakah food court leh handloom exhibition buatsaih leh tura rel a ni a. Kut lawm chhung hian kut chhimtute tan vei vah a remchan zawk nan No-Vehicle Zone siam rel a ni bawk.