Vawiin khan NLUP Implementing Board Conference Hall-ah UN Programme Coordination Office enkawl chhunzawm hna NLUP Implementing Board kuta hlan inkhawm buatsaih a ni a,  UN Joint Initiative Project (2014-2017) hun a lo tawp tak avangin ruahmanna thar a awm hma chuan UN Programme Coordination Office hi  NLUP Implementing Board in lo enkawl rih tura hlanchhawn niin a enkawl chhunzawm zel dan tur chu Chief Minister hova rel leh tur a ni. Office inhlanchhawnna lehkha hi United Nations aiawhin Pu Rinzuala, Coordinator, UNDP in a hming a ziah hnan a, NLUP Implementing Board aiawhin Pu James Lalrinchhana, Secretary, NIB in a ziak ve thung a ni.

NLUP Implementing Board kuta UN Programme Coordination Office hlanchhawn ani chu UNO leh Mizoram Sawrkar thawhhona bung khatna kharna a ni tih sawiin NIB Chairman Pu JH Rothuama chuan Bung hnihna keu leh thuai anih dawn thu leh kawng hrang hranga thawhho chhunzawm zel anih tur thu a sawi a, UN Agency ten Mizoram an rawn zawnchhuahna leh Mizoram sawrkar hotute tan lakna ropui a tih thu sawiin kum thum chhungin UN Joint Initiative Project atangin thil tha tam tak zirchhuah anih thu a sawi bawk a ni.

NIB Vice-Chairman Pu PL Thanga pawhin UN Joint Initiative Project lo pianchhuah dan leh Mizorama an rawn luh dan chipchiar takin a sawi a, Bung khatna tunah hian zawh fel nit a in bung hnihna ah kan lut dawn a, he hun kan thlen theihna tur hian Mizoram Sawrkar hotute leh Line Department hrang hrang te an thawkrim em a, an thawhrim rah a tha zawngin Mizoramin a tel tan mek a ni a ti a, Mizorama an rawn thawh tak tak hma in UN  Agency hrang hrang hotuten ruahmanna tha tak an siam a, vawi duailo Mizoram rawn tlawhin a hmunah thil awm dan dik tak an rawn zir chiang hmasa a, hemi behchhana hma an lak avangin an hmalakna te hian belhchian a dawl hle a ni a ti bawk.

Pu Rinzuala, Coordinator, UNDP pawhin UN Agency pali- UNDP, FAO, ILO leh UNIDO ten an hunbi tiam ang tluang taka hmang zova Mizorama hma an la thei chu thil lawmawm leh chhinchhiahtlak a ni a ti a, NLUP Implementing Board ten en an thawhhona that vanga tluang taka hma an lak theih avangin lawmthu a sawi a, Mizorama UNO an rawn lut chu thil lawmawm leh pawimawh tak a ni a, Project leh tangka an rawn luhpui chu pawimawh viau mahse UNO darthlalang a Mizoram an tel ve ta chu a lawmawmna lai ber a ni zawk a, tun bakah hian project lian zawk kalpui tura tan lak mek a ni a, Mizoram tan hmasawnna leh hlawkna nasa zawk UNO kaltlangin a rawn luh zel a beisei thu a sawi a ni.

Mizoram Sawrkar leh United Nations Organisations peng pali te thawhhona thuthlung hi October ni 16, 2014 khan ziah niin he thawhhona hi  kum thum (2014 – 2017) chhung atana ruahman a ni a, UN Organisation pali - United Nations Development Programme (UNDP), Food & Agriculture Organisation (FAO), United Nations Industrial Development Organisation (UNIDO) leh United Nations International Labour Organisation (ILO) te an tel  a. He Project in a tum bulpui ber chu ‘food security, livelihood security, energy and environment security, ecological balance, sustainable livelihood, income generation leh ecosystem venhimna atan mau hman tangkai, agriculture leh a kaihhnawih hman tangkai leh market linkage te an ni a, ruahman anga tluang taka he project hi kalpui niin UN Agency te hian Mizoram hmasawnna atana ruahmanna an siam leh hmathlir an neih te Mizoram Sawrkar bawhzui tura an thehluh hnu ah December ni 31, 2017 khan he project hi tihtawp a ni ta a ni.