Chapchar Kut 2020 naktip 5th & 6th March 2020 a lawm tur inpuahchahna thlirhona meeting vawiin khan Chief Secretary Pu Lalnunmawia Chuaungo hovin Secretariat Conference Hall, MINECO-ah neih a ni.

Chapchar Kut 2020 hi phur leh hlim taka mipuiten an hman theih nan inpuahchahna felfai tak neih a tul tih Pu Lalnunmawia Chuaungo chuan a sawi a. Hemi atan mawhphurtu Department hrang hrangte chu an tihtur theuh phur tak leh kimchang taka thawk turin a ngen a ni.

Kumin Chapchar Kut thupui hi ‘Zonun zemawi chawisan’ tih a ni a. A lawmna programme ni 2 awh Lammual a 5th & 6th March, 2020 a hman a nih dawn bakah 5th March zingah Chapchar Kut Tlan (Run) neih a ni dawn a. Art Exhibition, Vanapa Hall ah buatsaih a ni ang a, Flower Show, City Park-ah neiin, handloom Exhibition Lammual-ah neih a ni bawk ang.

Chapchar Kut hi ASEAN Countries ram pariat (8) atangin Ambassador 8 ten an rawn chhim dawn bawk a, Myanmar atangin Mizzima Media mi 5 te pawh an rawn kal dawn bakah hmun dang atanga he hun rawn hmnag turte pawh an awm nual bawk a ni.

Chapchar Kut hmanna lammuala kal tur hian Motor Parking a tawt dawn avangin OfficialCar parking nei tura Organising Committee in a tih ni lote chu Gate pui atanga kea chhuk mai tura ngen kan ni.

Chapchar Kut lawmna a kal tur zawng zawng te chu Mizo thuam dik taka inchei turin Kut Committee chuan a ngen a, hlim taka hmang theuh turin duhsakna a hlan a ni.