Ni thum chhung awh tur Chapchar Kut Art Exhibition 2020 chu vawiin khan I&PR Director Pi Lallianpuii’n Aizawl Vanapa Hall-ah a hawng.

Khuallian Pi Lallianpuii chuan art hi mihringte nun tinuamtu leh tifamkimtu, ram leh hnamin sulhnu a hnutchhiah vawn thatna, ram pawn hla tak thleng pawha hnam ziarang phochhuaktu a ni, a ti. Artist-te chuan mita kan hmuh thil hrang hrang suangtuahna mitthla ril tak nen lemziak, lem ker leh thlalak hmangin an phochhuak, Director chuan a ti a. Thlalak leh lemziak hmanga kan thil vawnthat te hi kum tam tak hnuah pawh awm reng tur a nih avangin pipute sulhnu mipui hmuh theih tura dah uar zel tur leh tan la sauh sauh turin a fuih a ni.

I&PR Deputy Director Pi PB Lianthangpuii kaihhruai he programme-ah hian Pu C. Laltanpuia, President, Mizoram Art Development Society (MADS) leh Pu Tlauliana, President, Mizo Photographers Society (MPS) ten thu an sawi a ni.

Chapchar Kut Art Exhibition ah hian MADS member 40 te kutchhuak lemziak 87 pho chhuah a ni a. MPS member 33 te kutchhuak thlalak 64 phochhuah a ni bawk. Chapchar Kut Art Exhibition hian March ni 6 thleng a awh dawn a, mipui a duh apiang tan tlawh theih a ni. Vanapa Hall bathlarah Photobooth mawi tak siam a ni bawk.