Kumin Chapchar kut lawmna chikhat atan Information & Public Relations Department leh Aizawl Art Gallery tang kawpin Chapchar Kut Art Fest -2009 tlawh man hla tak an buatsaih chu vawiin khan Vanapa Hall -ah hawn a ni.

 

 

He hawnna inkhawm tawite buatsaih hi Pu Lalnunpuian a kaihruai a, Chapchar Kut Art Fest-2009 buatsaih a nih dan I&PR Director, Pu L.R.Sailovan sawiin Art hi hnam Culture darthlalang leh hnam changkang tehna pawimawh tak ani a. Greek leh Rome hote an ropuina tehna pawh an Artwork vawn him danah te khawvel hmuh theiha an phochhuahnaah te a innghat lian hle a. Chuvangin kan Mizo Artwork pawimawh tak takte an ral mek zel laiin Artist ten an lemziah hmangin min humhim sak thei ani tih hriain Art  Fest-2009 hi buatsaih a ni a ti. Mizoram lehkha thiam tamna berah hnam changkang tehna lian ber Art a kan hmathlirte en chungin he Chapchar Kut Art Fest-2009 hi mi zawng zawngin hluta  tlawh theuh turin a sawm a ni.

Aizawl Art Gallery neitu Pu Laltanpuia pawhin he Chapchar Kut Art Fest-2009 buatsaih hun chhunga thil hlu tak tak pholan tur chung chang leh Art Fest puala Senior leh Junior tan March ni 18 a Competition buatsaih a nih tur thu a sawi a. March ni 12-18 chhunga Chapchar Kut Art Fest a tel tur hian mi 58 ten hming an pe lut tawh a; hetah hmeichhia Art lama tui tak tak 12 zetin hming an pe lut tawh a. A hmunah lemziakin an kuthnute phochhuah zel a ni dawn a ni ati.

He Chapchar Kut Art Fest-2009 ah hian Indian National Trust for Art & Culture Heritage (INTACH) Mizoram Branch in Mizo hranghlui mi hmingthate thilhlui- thawmhnaw, lehkhaziak, bungrua chi hrang hrang en theihin an phochhuak bawk a. An hotute Prof.Dr.Laltluangliana Khiangte leh Pu R.Thanseia ten thu sawiin hei hi thangthar ten kan Mizo thilhlui hlu tak tak an hmuha an ngaihhlut phah nan a phochhuak an ni an ti.

He Chapchar Kut Art Fest-2009 ah hian L.R.Mutimedia Inc.leh thildang hmuh manhla tak tak an inpho chhuak bawk a ni. March 12-18,2009 chhung hian tlawh theih reng a ni dawn a ni. A hawnnaah hian Chanchinbu mite leh sawmbikte an kal tha hle.

 

 

 

{mospagebreak}