KTP General Conference nena a hun a innan vanga District Chapchar Kut Celebration Committee in Champhai tan kumin Chapchar Kut lawmna hun sawn a dilna GAD in a lo pawmsak angin vawiin khan Champhai Kahrawt Field-ah Chapchar Kut lawm a ni a. He hunah hian Parliamentary Secretary leh Champhai North bialtu MLA ni bawk Pu TT Zothansanga chu Kut Pa a ni.

Kut Pa chuan thu sawiin, Chapchar Kut tobul kan thlir chuan kum khat tla buh rin tur an neih lawmna a nih vanga hun hlimawm tak hmang an ni a. Vawiina hlim taka kan lawm piah lamah hian taimak leh intodelh tumna min pe thar tu ni thei se a tih thu a tarlang a. Mizo hi tlawmngai hman kan nih angin chhiat thatah pawh kan in tawiawm tha thin hle a. Tunlai thal khaw ro lai hian in kang ram kang te a lo chhuak duh hle a. Chung chhiatna a lo thlen thulah tlawmngai a mi an thawhchhuah chuan tangkaina leh tih theih nei ve lo te chuan hnathawkte dip thei leh lo dal thei khawp a lo tel ve lo turin leh, inthiarfihlim nachang kan hriat thin pawimawh a tih thu a sawi a ni.

Pu TT Zothansanga chuan tunlai changkanna in a ken tel TV, Computer, Mobile Phone leh a dang hrang hrang te kan hman danah kan fimkhur tlan a, hun khawhral nan a a chhe zawnga hman lo turin leh a hmasawn zawnga hmang thiam turin kalkhawmte chuna chah a. Aia upate zahna kawngah pawh kan harhthar a tul zia a sawi bawk.

Vawiin Chapchar Kut lawmnaah hian Mizo Lam chi hrang hrang entir a nih bakah malzai leh zaipawl te ngaihthlak a ni a. Kut lawmna kal zinga naupang kum 6 hnuai lam tan Mizo incheia inchei nalh mipa leh hmeichhia tan lawmman buatsaih a ni bawk.