Industries Department buatsaih Chapchar Kut Food Fest chu vawiin khan Aizawl Sipai Lammualah Minister Pu H.Rohluna’n a hawng.
March ni 7 thleng awh tur Chapchar Kut Food Fest hawnna thu sawiin Pu H.Rohluna chuan mihring khawsak changkang zelah ei leh in kan fimkhur telh telh a, eitur hrisel leh changkang lei duh kan lo tam tak avangin eisiam hi Mizoramah pawh sum lakluhna hnar tha tak a lo tling ta, a ti. Food Processing ah nasa takin hma kan sawn a, eizawnna ngialnghet atana hmangte kan pung chho zela, reilote atana hlawkna um ai chuan tlem tlema hma sawn a, ngelnghehna um hi a tlo zawk a ni, a ti a. Eitur siama ei zawng te ngat phei chuan ei leh in thianghlim, tui leh hrisel tak buatsaih an tum tur a ni a, mawi tak leh thianghlim takin an eitur zawrhte fun mah sela, mi hmuh phak lohva an eisiamna hmunte a thianghlim si loh chuan mihring hriselna nasa takin a khawih pawi thei a ni tih hria a fimkhur turin Industries Minister chuan a chah a ni. State Food Processing Mission kaltlangin sorkar chuan eitur siam kawnga eizawnna bul tan turte a tanpui thin a. Sorkar laipuiin scheme thenkhat a tihtawp tur zingah National Food Processing Mission a tel tak avang erawh chuan hemi kawngah hian sorkarin hma a lak zel dan tur hriat theih a la ni lova, chutihrualin sorkar tanpuina tel hauhlova mahni ke a ding hlawhtling tak tak an awm chho mek bawk a. Thenawm ramte nena insumdawn tawnna hmun Zokhawthar leh Kawrpuichhuah hawn a nih hunah phei chuan khawchhak lam atanga rawn lut lo lei ringawt lovin Mizoram thil siam chhuah kan thawnchhuah ve ngei theih nan Mizo mipuite tang sauh sauh turin Pu H.Rohluna chuan a fuih a ni.
Chapchar Kut Organising Chairman, Art & Culture Minister Pu R.Romawia pawhin Chapchar Kut Food Fest buatsaih a ni chu lawmawm a ti a. Mizo Kut ropui ber denchhen hian Assembly Annexe-ah Flower show-cum-sale leh Vanapa Hall bathlarah Chapchar Kut Photo Exhibition neih mek niin a lawmna pui ber naktuka Sipai Lammuala hman a nih rual hian District hrang hrangah lawm a ni dawn bawk, tih a sawi a. He kut hi Mizo mipuite ta a nih ang ngeiin hlim leh lawm taka hmang theuh turin mi tinte a chah a. Mimal hlawkna chauh um lova Mizo tlawmngaihna rilru pu chunga Kut puala Exhibition hrang hrang buatsaihtute chungah Pu R.Romawia chuan lawmthu a sawi bawk a ni.
Chapchar Kut Food Fest 2015 hawnna inkhawm hi Industries Special Secretary Pu Sangdingliana’n a kaihruai a. Industries Joint Director Pi R.Lalrodingi’n he Fest huaihawt a nih dan tlangpui a sawi a, Industries Addl. Director Pu C.Lalbiakthanga’n lawmthu sawiin hun hnung a khar a ni.
Chapchar Kut Food Fest hi nitin zing dar 10 atanga tlai dar 5 thleng tlawh theih a ni a. Stall hrang hrang 22 awmin, a hmuna ei nghal theih eitur hrang hrang leh a pack-a lei chi Mizo siam pickle, juice, chocolate leh bakery lam thil thlengin lei tur a awm a ni.
