Vawiin hian Pu C. Ngunlianchunga, Minister of State for AH & Vety chuan Lawngtlai Central YLA Hall ah Lawngtlai District Village Council Association General Conference ni hnihna chu Khuallian niin a hman puia, VC te chu rinawm taka an khawtlang rawngbawl turin a fuih.

Khuallian chuan, sawrkar kalphung hi a dikin a tha em em mai a, hmasawnna hnathawhna tur te a tam thei ang ber a dawngtu tur khawtlang hruaitute hnenah dah a ni ta. Sawrkar sumin an ta tur anmahni ngeiin thawk rawh se min ti tihna a ni. Heng hmasawnna sum lo kal te mahni inhaivur nana diklo taka hman ching VC chu an khawtlang tan hmelma chimawm tak an ni ta ber a, fimkhur a ngai em em a ni a ti. Kan khawtlang hmasawnna tur kan VC ten min thawh sak loh chuan khawdang VC ten an rawn thawk dawn lo a ni tih hriain khaw hnufual bik, khaw thenawmte aia changkang lo bik nih hlauva inelna thianghlim kan tan a hun ta tiin Lawngtlai District chhunga VC kalkhawm te chu a chah a ni.

Pu C. Ngunlianchunga chuan, tun hnaiah chhim lam, a bikin Lawngtlai District in hmasawnna thar kan dawng mawlh mawlh mai a, Multi-modal Transit Transport Project chu chak taka kalpui mek a ni a, Kaladan Hydro-Electricity Project kal pui mek a ni bawk a, World Bank sum hmangin kawngpui thar sial tuma hmalak mek a ni. Hengte hi India sawrkar in Asia ram zau zawkte nena inthlun zawmna atana a ruahman a ni a, chu mi zar chu kan dawng mek zawk a ni. Heng hnathawh mek te hi a lo puitlin hun chuan Asia khawmualpui sukthlek hi a danglam dawrh thei hial dawn a, chu remchang chu keini hian a tha zawnga kan lo chhawr ve theih nan taihmak, rinawm leh thawhho thiam kan mamawh a ni a ti. Hun engemaw chen District VC Association a thuanawp tawh hnua thar thawh leh a ni thei chu lawmawm hle a a hriatthu a sawi bawk.

Vawiina Lawngtlai District VC Association Conference ni hnihna chawhma inkhawm hi an pawl President Pu. H. Lalropuia’n a kaihruai a, chawhnu lamah MJA te kaihhruaina hnuaiah inthlanna an neih leh hnuah zanriah an kilho nghal ang.