Vawiin khan Industries Department buatsaih ‘Chapchar Kut Food Fest 2016’ chu Industries Minister Pu Rohluna chuan AR Lammual Basketball Court-ah a hawng a. He Fest-ah hian Food Processing stall 13 Food Service stall 11 bakah Handloom Stall 8 lai hawn a ni.

Khuallian, Industries Minister Pu H. Rohluna chuan Fest hawn paha thu sawiin Mizo mipuite intawhkhawmna pawimawh ber, Chapchar Kuta Ei siamthiamte leh puantahtute tan inphochhuahna hun tha tak buatsaih a ni chu lawmawm a tih thu a sawi a. Nikum thleng khan Food Fest chu National Mission on Food Processing (NMFP) sum hmanga buatsaih thin a ni a, kuminah erawh chuan sawrkar laipuiin NMFP scheme a tihtawp tak avangin sum lamah harsatna tlem an tawk tih sawiin Khuallian chuan, Food Fest kalpui chhunzawm a nih theih nana Department hmalakna chu a fak a, kuthnathawktuten a rah an seng dawn a ni, a ti bawk. Ei leh in siam pawimawhna sawiin Pu H. Rohluna chuan, “Mihring hriselna nghawng thei a nih avangin uluk a ngai hle a; chutihrual erawh chuan tui tak leh tuihnai taka siam thiam a ngai a ni,” a ti bawk. Mizo kutchhuak ei tur leh puantahte hi rampawn thlenga thawn chhuah tlak a nih avangin sawrkar laipuiah ruahmanna (Proposal) thlen a nih tawh thu a sawi bawk. Khuallian chuan stall hrang hrangte tlawhin an harsatna a ngaihthlak sak bakah hmalak dan turte a sawipui nghal a ni.

Chapchar Kut Food Fest 2016 hawnna inkhawm hi Industries Department-a Additional Director Pu C. Lalbiakthanga’n a kaihruaiin kalkhawmte leh entrepreneurs-te lawmna thu a sawi a. Joint Director Pu H. Thangmawia chuan lawmthu sawiin hun a khar a ni.

Industries Department hian kum 2014 atangin Chapchar Kut apiangin Food Fest a buatsaih thin a ni.